Upat ka giingong drug pusher ang nadakpan sa kapulisan sa managlahing buy-bust operation sa Dakbayan sa Toledo ug Lungsod sa Daanbantayan diin dul-an P800,000 ang balor sa tanang ginadiling drugas nga nasakmit niadtong Huwebes, Agusto 6, 2026.
Sa Lungsod sa Daanbantayan, nadakpan sa mga operatiba sa Street Drug Enforcement Unit (SDEU) sa Daanbantayan Municipal Police Station ang tulo ka "big-time" drug pusher sa Sityo Tagasa, Barangay Maya.
Nasakmit gikan sa posisyon sa tulo ka suspek ang 110 ka gramos nga gidudahang shabu nga adunay standard drug price nga P748,000.
Samtang sa Dakbayan sa Toledo, napusasan sab sa kapulisan ang usa ka drug pusher nga naila sa alyas nga "Toktoy", 46, adunay kapuyo, sa usa ka operasyon sa Barangay Campo 8, alas 9:59 sa buntag sa samang adlaw.
Narekober gikan ni Toktoy ang 2.56 ka gramos nga shabu nga nagkantidad og P17,408.
Ang upat ka mga dinakpan gikatakdang pasakaan og kasong paglapas sa Republic Act 9165 o ang Comprehensive Dangerous Drugs Act of 2002. / GPL
