Adunay 400 ka contingency Automated Counting Machines (ACMs) sa nagkadaiyang local government units (LGUs) sa Sugbo ug Bohol nga giandam sa Commission on Elections (Comelec) isip backup kon ugaling naay counting machine nga dili mo-function atol sa eleksyon karong Mayo 12, 2025.
Si Comelec Region 7 Director Francisco Pobe nagkanayon nga ang ekstra nga mga makina maoy magsilbi nga backup.
“These contingency ACMs are there in case some units suddenly malfunction. We really cannot predict how the machines will perform during actual voting, so we need to be ready,” matod ni Pobe.
Ang mga backup units kasamtangan nga gibutang sa canvassing centers sa matag LGU alang sa dali nga deployment kon gikinahanglan.
Kapin sa 1,500 ka ACMs usab ang na-deliver sa Sugbo ug Bohol nga maoy gamiton sa mga polling precinct.
Gipasalig ni Pobe sa publiko nga ang tanan nga mga makina gi-testingan na ug anaa kini sa maayo nga kondisyon.
Ang katapusan nga pagsulay ug pagbugkos sa mga makina gihimo kaniadtong Mayo 7.
Matod ni Pobe, ang resulta nagpakita nga functional ang tanang ACMs atol sa testing process. “All the vote-counting machines distributed for use in the elections are fully functional. We did not encounter any issues during final testing,” dugang niya. / CAV