Mokabat sa 400 ka mga personahe sa Lapu-Lapu City Police Office (LCPO) ang ipakatap aron masiguro ang kaluwasan sa mga bisita ug mga deboto atol sa 460th Fiesta Señor Traslacion 2025 sa tungang gabii sa Enero 18, 2025.
Ang tigpamaba sa LCPO nga si Lt. Col. Christian Torres nitug-an sa mga tigbalita sa usa ka press conference nga ang mga polis ipahimutang gikan sa unang taytayan paingon sa Nuestra Señora de Regla Parish National Shrine sa Dakbayan sa Lapu-Lapu.
Si Torres niingon nga ang maong lakang gitumong sa pagpausbaw sa seguridad atol sa tradisyunal nga Traslacion motorcade diin ang relihiyuso nga imahen ni Sr. Sto. Niño dad-on sa Lapu-Lapu City.
Dugang pa niya nga human sa misa nga gipaabot nga mahuman sa alas 6 sa buntag, gipakatap usab ang mga awtoridad sa pagmonitor sa pipila ka mga lugar atol sa tinuig nga seaborne procession sa Fiesta Señor.
“We have police officers positioned at key areas like the Muelle Osmeña Wharf and the first bridge since these are the main gathering points for people during the fluvial procession. These personnel are deployed to ensure peace and order, as well as to manage the traffic flow on the bridge,” matod ni Torres.
Ang parada sa tubig dagat naghandom sa pag-abot ni Ferdinand Magellan sa Sugbo niadtong 1521. Usa ka galleon nga may larawan sa Sagrada Familia ang mobiyahe agi sa Mactan Channel gikan sa Lapu-Lapu City paingon sa Basilica Minore del Sto. Niño de Cebu.
Niadtong 2024, gibanabana nga 4,000 ngadto sa 5,000 ka indibidwal ang misalmot sa Traslacion ug seaborne procession.
Sa laing bahin, ang hiniusang paningkamot sa nagkalainlaing local law enforcement agencies ug City Government nipahigayon og bombing simulation exercise nga nagsundog sa usa ka pagbuto nga gisundan sa stampede niadtong Martes, Enero 14.
Si Torres niingon nga ang simulation kabahin sa preparasyon sa Traslacion sa simbahan nga gidesinyo aron matubag ang posibleng "worst-case scenario" nga mahitabo atol sa relihiyusong kalihukan.
“We planned for a potential explosion and outlined the necessary steps to take in such a situatio. We also emphasize vigilance. We call on everyone to help watch out for suspicious individuals, objects, or backpacks left unattended anywhere and report it immediately. Let’s work together and stay alert,” dugang n Torres. / DPC