Nakakulit og bag-ong kasaysayan si Stephen Curry atol sa dakong daog sa hosts Golden State Warriors batok sa Sacramento Kings, 130-104, ning Biyernes, Marso 14, 2025 (PH time), sa National Basketball Association (NBA).
Ning sangkaa, ang two-time MVP nahimo nga labing unang magduduwa nga nakaabot og 4,000 ka three-pointers nga napasulod sa kinatibuk-an.
Nakataak si Curry ning maong marka dihang nakapasulod siya og tres gikan sa assists ni Moses Moody sa nahabiling 8:19 minutos sa 3rd quarter.
Human niini, adunay tribute nga gipakita sa big screen aron pasidunggan si Curry sa bag-o niyang rekord, nga iyang nahimo usa ka adaw sa dili pa ang iyang ika-37 ka mga tuig nga adlaw nga natawhan.
“What do you get for the guy who has everything? Maybe I’ll give him a day off,” matod sa mapahiyumong si Warriors coach Steve Kerr.
Sa pagsugod sa duwa, si Curry nagkinahanglan na lang og duha ka three-points paingon sa makasaysayong panghitabo.
“When that second one went in I knew there was a lot of game left so I tried to not get too ahead of myself,” matod ni Curry.
“But it was a special moment to feel that energy and allow them to enjoy that milestone and accomplishment with me.”
Ang kanhi rekord sa labing daghang three-point shots nga napasulod (2,973) sa usa ka magduduwa narehistro ni Ray Allen. Gibuak kini ni Curry kaniadto pang 2021.
“He’s changed the game in so many different ways,” matod ni Kings coach Doug Christie kabahin ni Curry.
Ning sangkaa, igo lang nimugna si Curry og 11 puntos apan nakuha sa Warriors ang dakong daog pinaagi sa ilang balanseng ataki nga gihimo.
Aduna pa’y laing pito ka mga magduduwa ang Warriors nga nakahimo og dobleng numero nga puntos nga gipangulohan sa 23 ni Draymond Green. / AP