Samdan sa buko-buko ang 41 anyos nga lalaki human giingong dunggaba sa iyang kalalis atol sa gituohang road rage tali sa mga nagmotorsiklo sa Hilltop, Barangay Casili, lungsod sa Consolacion, alas 8:00 sa gabii sa Huwebes, Abril 11, 2024.
Ang biktima giila nga si Rodelo Palas, 41, minyo, taga Sityo Cambohan, Brgy. Casili, Consolacion samtang ang suspek giila nga si Carl Anthony Herosa Albangbang, 22, ulitawo, taga Brgy. Jubay, lungsod sa Liloan.
Sa follow up sa Superbalita Cebu sa Consolacion Police Station, nasuta sa imbestigasyon ubos sa kamandoan sa ilang hepe nga si P/Lt. Col. Verniño Bustillo Noserale nga ang duha nag-abot sa maong dapit nga nagmaniho sa ilang tagsa-tagsa ka motorsiklo.
Nagkalalis ang duha kay hapit sila makadinasmagay. Ang suspek nga giingong armado og hunting knife, niibot sa iyang dala ug gidunggab ang biktima.
Atol sa hot pursuit sa kapulisan, nasikop si Albangbang ug gitanggong sa Consolacion Police Station alang sa pag-atubang sa kaso batok kaniya nga ipasaka sa biktima. / DVG