Gikatakdang sugdan karong tuiga sa Kagamhanan sa Dakbayan sa Naga ang pagpatuman sa usa ka 42-kilometro nga diversion road project apan wala pa masayri ang eskedyul sa groundbreaking ceremony.
Ang proyekto kabahin sa master plan sa Kagamhanan sa Siyudad aron mapauswag ang network sa dalan ug makahatag og alternatibong agianan sa mga motorista.
Gisulti ni Mayor Valdemar Chiong sa mga tigbalita nga ang diversion road gibanabana nga mobalor og P1.8 bilyon gikan sa inisyal nga diskusyon.
Matod ni Chiong nga anaa na ang master plan alang sa road network, samtang ang siyudad nagtrabaho na karon kon unsaon pagpatuman ang proyekto nga dili sila mabug-atan sa pinansyal nga aspeto.
Ang gisugyot nga road network magsumpay sa habagatang bahin sa Naga paingon sa Dakbayan sa Toledo ug moluntad gikan sa Naga-Uling Road hangtod sa Estaca sa Minglanilla.
Asoy ni Chiong nga nahuman na ang assessment ug mga pagtuon alang sa proyekto.
Ang gitutokan na lang sa pagkakaron mao ang pagtino sa pamaagi sa pagpatuman nga magtugot sa konstruksyon nga magpadayon sa hinayhinay samtang gipreserbar ang pinansyal nga kapasidad sa Kagamhanan sa Siyudad.
Matod ni Chiong nga adunay giaprubahan nang daan nga P2-bilyon nga pundo gikan sa Development Bank of the Philippines nga makatabang sa pagpundo sa proyekto.
Hinuon, giingon sa mayor nga giisip sa Kagamhanan sa Siyudad ang phased implementation scheme, diin ang mga bayrunon ibase sa mga bahin sa dalan nga nahuman matag tuig.
Gidugang niya nga ang Kagamhanan sa Siyudad makagahin og mga P100 milyon kada tuig alang sa road network infrastructure project, samtang ang nahuman nga mga bahin mahimong pundohan pinaagi sa mga pautang sa hinayhinay. / DPC