Gipahigayon ang usa ka lig-on nga pagbansay sa Camp Coordination and Camp Management (CCCM) ug Internally Displaced Persons Protection (IDPP) niadtong Hulyo 29 hangtod Agusto 1, 2025, sa Dakbayan sa Naga, Probinsiya sa Sugbo.
Gihimo kini sa Department of Social Welfare and Development (DSWD) Field Office VII pinaagi sa Disaster Response Management Division (DRMD), uban ang mga miyembro sa City Disaster Risk Reduction and Management Council (CDRRMC), mga responder sa City Disaster Risk Reduction and Management Office (CDRRMO), ug mga social worker sa City Social Welfare and Development Office (CSWD).
Niabot sa 43 ka mga partisipante ang nitambong sa pagbansay nga giorganisar sa Local Government Unit (LGU) sa Naga City aron mas mapalambo pa ang ilang abilidad sa epektibong pagdumala sa mga evacuation center ug sa pagpanalipod sa mga internally displaced persons kon mga katawhang napugos nga mobiya sa ilang puluy-anan tungod sa kalamidad o emerhensya.
Gipangulohan sa mga eksperto ang sesyon sama ni Mildred Abela, CCCM ug IDPP Focal Person sa DSWD–Region 7; Alvin Rosthelo T. Santillana, Hepe sa CDRRMO sa Talisay City; ug Flen D. Maquiling, MSWDO Hepe sa Candijay, Bohol.
Sumala sa DSWD Field Office 7–Central Visayas, ang DRMD magpadayon sa paghatag og teknikal nga tabang sa CCCM ug IDPP isip kabahin sa mas halapad nga paningkamot sa pagtukod ug mas episyente ug epektibong disaster management system sa lokal nga lebel.
Pinaagi sa maong pagbansay, gilauman nga mas mahasa ang mga lokal nga lider ug responder sa pagdumala sa evacuation centers, paghatag og hustong proteksyon sa mga biktima sa kalamidad, ug pagsiguro nga mapanalipdan ang matag kinabuhi. / PR