444 mibenepisyo sa Akap

SunStar Local News
SunStar Local News

Niduyog sa tibuok nasod nga paglusad sa Ayuda sa Kapos ang Kita Program (Akap), ang Barangay Ibabao, dakbayan sa Mandaue niadtong Mayo 17, 2024.


Si Congresswoman Emmarie "Lolypop" Ouano-Dizon sa Mandaue kauban ang mga city councilor ug mga opisyal sa barangay nga gipahigayon sa Barangay Ibabao gym. Mao kini ang unang pag-apud-apod sa maong matang sa Mandaue nga gihimo dungan sa ubang mga rehiyon sa tibuok nasod.


Atol sa maong kalihokan, si Ouano niingon nga 444 ka indibidwal o P1.3 milyunes ang nakadawat sa ilang hinabang pinansyal ubos sa maong programa. Siya nidugang nga una pa lang kini sa serye sa mga aktibidad ubos sa Akap.


“Sinugdanan pa lang kini sa maong programa ug sa pagpadayon sa suporta gikan sa gobyerno,” matod ni Ouano-Dizon.


Dugang niya, ang tabang sa Akap gituyo aron mahatagan og prayoridad ang low income earners o kadtong mga trabahante nga nagdawat lang og minimum nga sweldo lakip na ang solo parents, fisher folks, vendors ug susamang sektor.


“Kini gisugdan sa atong Pre­sidente Ferdinand ‘Bongbong’ Marcos Jr., ug sa panahon ni House Speaker Martin Romualdez, lakip na si DSWD Secretary Rex Gatchalian, para mahatagan og pagtagad ang mga mamumuo nga “low income earners o minimum wage earners” sama sa sector sa solo parents, fisherfolks, vendors, ug uban pa,” dugang niya.


Nagpasalamat siya kang Presidente Marcos ug Spea­ker Romualdez alang sa mga residente sa Mandaue City.


Ang Akap kabahin sa halos P500 bilyon nga social amelioration program o ‘ayuda’ alang sa labing minos 12 ka milyon nga mga kabus ug ubos ang kita nga mga pamilya o gibanabana nga 48 ka milyon nga mga Pilipino ubos sa General Appropriations Act (GAA) sa 2024.


Nitambong usab sa maong kalihukan ang mga personahe sa Department of Social Welfare and Development (DSWD), Opao Brgy. Kapitan Nixon “Jojo” Dizon, Konsehal Inday Nerry Soon-Ruiz, Konsehal Atty. Joel Seno, Konsehal Anjong Ouano Icalina, Konsehal Ting Sol Cabahug, Consolacion Konsehal Alfie Ouano, Ibabao-EstAncia Brgy. Kapitan Tingy Echavez ug Konseho. (PR)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph