Nagpagawas ang Department of Migrant Workers - Regional Office VII (DMW RO-VII) og kinatibuk-ang P460,000 nga tabang pinansyal alang sa mga Overseas Filipino Workers (OFWs) ug ilang mga pamilya nga nagpuyo sa Dakbayan sa Mandaue niadtong Agusto 4, 2025.
Gikan niini, P350,000 ang gipang-apudapod sa lima ka OFWs ug ilang Next-of-Kin (NOKs) ubos sa Agarang Kalinga at Saklolo Para sa mga OFWs na Nangangailangan (Aksyon) Fund nga nagtumong sa pagtabang sa mga OFW nga nagkinahanglan og daliang ayuda.
Samtang P110,000 ang gitagana ubos sa Livelihood Program for OFW Reintegration (LPOR) nga napahimuslan sa 11 ka OFWs isip suporta sa ilang pagpanginabuhi sa pagpauli.
Mainitong gidawat ni Hon. Mayor Thadeo Jovito M. Ouano ang DMW RO-VII team nga gipangulohan ni Regional Director Jhoaden “Jao” G. Lucero, MM, EnP, CESO IV, kauban ang mga Division Chiefs ug personnel.
Ang maong panagtagbo nitumong sa paghisgot sa mga programa sa DMW ug sa posibleng pakigtambayayong sa LGU-Mandaue alang sa padayong suporta sa mga OFWs ug ilang pamilya.
Gibisita sab sa grupo ang buhatan ni Hon. Vice Mayor Glenn O. Bercede diin napalapdan pa ang posibilidad sa panagtinabangay tali sa DMW ug lokal nga panggamhanan.
Kini nga kalihukan usa ka timaan sa padayong paningkamot sa gobiyerno sa pag-atiman sa atong mga modernong bayani nga mao ang mga OFW. / PR