47 anyos nga babaye gipusil sa menor, kritikal

Cebu City map.
Cebu City map.

Naa sa talandugon nga kahimtang ang usa ka 47 anyos nga babaye human pusila sa menor de edad ala 1:31 sa kaadlawon sa Miyerkules, Mayo 15, 2024, sa Dan Tres de Abril, Barangay Pahina San Nicolas, Dakbayan sa Sugbo.

Ang biktima giila sa mga silingan nga si Marilou Villa­rico Abayan, lumolupyo sa naasoy nga dapit. Siya nakaangkon og samad pinusilan sa luyong bahin sa ulo.

Nailhan hinuon sa kapulisan ang suspek nga usa ka Kein (dili tinuod nga ngan), 16, uban sa usa ka alyas Jerome, 18, taga sityo Proper, Brgy. Ermita, siyudad sa Sugbo.

Matod sa mga saksi nga samtang nagbarog sa kilid sa karsada ang biktima, kalit lang nga niabot ang mga suspek sa likod sa biktima ug dayong lanit sa iyang armas si Kein ug gipusil ang lu­yong bahin sa ulo ni Abayan.

Human sa pagpamusil, dali nga ningsibat ang mga suspek paingon sa dalan Tupas samtang ang biktima dali usab nga gidala sa Cebu City Medical Center (CCMC) apan gibalhin sa laing tambalanan.

Kapulisan sa Sawang Police Station nagpadayon pa sa ilang manhunt sa mga suspek.

Matod ni Police Lieutenant Colonel Janette Rafter, deputy city director for administration sa Cebu City Police Office, nga drugas ang usa sa ilang gitan-aw nga motibo sa krimen.

Giingong nalambigit sa ile­gal nga drugas ang biktima, apan wa pa nila matino kon nganong gipusil siya sa mga suspek. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph