Patay ang 47 anyos nga inahan human nasaghiran sa truck van ang iyang gisakyang motorsiklo, alas 12:30 sa kaadlawon, Dominggo, Agusto 4, 2024, sa national highway sa Brgy. Tayud, lungsod sa Liloan.
Si Marivic Repdos Ybañez, minyo, empleyado sa usa ka sports wear company sa dakbayan sa Lapu-Lapu ug taga Brgy. Danglag, lungsod sa Consolacion, gideklarar nga dead-on-arrival (DOA) sa tambalanan sa dakbayan sa Mandaue.
Gitanggong si Junny Artajo Villegas, 35, minyo taga Minoyan, lungsod sa Murcia, Negros Occidental drayber sa truck van.
Si Patrolman Mark Anthony Bombales, Traffic investigator sa Liloan Police Station nga nahinabi sa Superbalita Cebu, nagkanayon nga ang biktima nagpadulong kini sa norte nga direksiyon ug ang truck van puno sa sinakong bugas padulong mag-deliver sa lungsod sa Tabuelan.
Ang biktima ni-overtake kini sa tuong habig apan tungod kay lubak-lubak ang karsada, natumba kini.
Sa pagkatumba niini nalatayan iyang ulo sa likod nga ligid sa trak.
Matod ni Bombales, maayong pagkapisat sa ulo sa biktima bisan nag-helmet. Nadala pa sa Eversley Hospital, Mandaue City pero gideklarar nga DOA ni Dr. Zarapril Techo-Carcallas.
Kasamtangang gitanggong ang driver alang sa pagpasakag tukmang kaso. /GPL