Niabot og 47 ka mga magduduwa ang gipang-ban sa Maharlika Professional Basketball League (MPBL) gumikan sa pagkahilambigit sa game-fixing, nga taodtaod na sab nga problema sa liga.
Basi sa taho sa www.gmanews.tv, wala pa gipangbutyag sa MPBL ang mga pangalan sa gipang-ban.
Niadtong 2019, ang nagtukod sa liga nga si boxing legend Manny Pacquiao ug Commissioner Kenneth Duremdes nianunsyo nga nagpasaka sila og kaso batok sa 21 ka mga personalidad tungod sa game-fixing lakip na niini ang tag-iya sa Soccsksargen Marlins nga nakasinati og 18 ka sunodsunod nga kapildihan niadtong higayuna.
Paglabay sa duha ka mga tuig, nirekomendar ang Department of Justice (DoJ) nga pasakaan og kaso ang 17 ka mga magduduwa ug personnel nga nalambigit sab sa game-fixing.
Sa laing bahin, giusab sa MPBL ang ilang patakaran nga limitahan lang og pito ka professional players ang matag team. Ning higayuna, wala na’y limit.
Niini, gilaumang magbaha ang kanhi mga magduduwa sa Philippine Basketball Association (PBA) sa MPBL.
Puwede sab makaduwa ang collegiate players kon makapasa kini og Special Guest Licenses (SGL) gikan sa Games and Amusements Board (GAB).
Ang sunod season sa MPBL sugdan karong Marso 16, 2024.