Lima ka tawo ang nangaangol human magbangga ang tulo ka motor sa Transcentral Highway, Sitio Buongon, Barangay Malubog, bukirang dapit sa Dakbayan sa Sugbo sa alas 5 sa kaadlawon, Lunes, Mayo 26, 2025.
Ang mga naangol giila nga silang John Maquisa, 25, usa ka welder nga residente sa Barangay Buanoy, Lungsod sa Balamban, ug angkas niini nga si Junill Mahilum, 30, taga Nangka, Lungsod sa Balamban.
Lakip sa naangol mao silang Rommel Nocedo, nga taga Barangay Bonbon, Dakbayan sa Sugbo nga nagmaneho sa iyang Honda Beat nga motorsiklo, Wilbert Mabini ug ang angkas niini nga si Jhon Gonfrey Mabini, 23, taga Barangay Babag, Siyudad sa Sugbo.
Sa imbestigasyon sa Traffic Enforcement Unit sa Cebu City Police Office, nasayran nga ang tulo ka motorsiklo nagdagan sa managlahi nga direksyon.
Silang Maquisa og Nocedo paingon sa Dakbayan sa Sugbo nga gihulagway sa mga saksi nga hinay lang ang dagan, samtang si Mabini paingon sa Balamban.
Apan kalit lang matod pa nga nitipas sa lane nga iyang gisubay si Mabini nga maoy hinungdan nga silang tulo nagkabangga. Tungod sa kakusog sa impact, ang tulo ka motorsiklo ug ang mga sakay niini pulos nangatumba.
Dali nga naabot ang ambulansya ug gipanghatod ang mga biktima sa Cebu City Medical Center.
Matod sa mga nakasaksi nga tungod sa kakusog sa dagan nilang Mabini, na-overshoot sila sa pikas lane ug wala na niya makontrolar ang motor hinungdan nga nibangga sa duha ka motor nga gikasugat nga paingon sa Siyudad sa Sugbo.
Si John Maquisa nga nahinabi sa DyHP mibutyag nga hinay lang ang ilang dagan gani nagsunod lang sila ni Nocedo.
“Nagsunod mi'g padagan sir, pero nidistansya mi kay ngitngit pa man kay basin magdumbol mi ba pero naabtan gyud mi sa na-overshoot nga naka-Mio,” matod ni Maquisa.
Padulong sila sa Dakbayan sa Sugbo aron magpa medical alang sa ilang trabaho isip welder sa Tsuneishi sa Barangay Buanoy.
Ilang gihulagway nga hubog ang nag-drive sa motor nga nakabangga kanila. / AYB