Nagusbat ang usa ka Toyota Vios sa dihang nahagbong sa bung-aw sa Sityo Masaba, Barangay Adlaon, bukirang dapit sa dakbayan sa Sugbo, alas 12:00 sa tungang gabii, Dominggo, Disyembre 17, 2023.
Ang lima ka mga batan-on nga sakay sa awto, tulo ka mga lalaki ug duha ka mga babaye, pulos luwas na ang kahimtang apan nakaangkon og grabeng samad sa ilang lawas.
Sa Facebook post ni Ramil Ayuman nagkanayon nga ang mga emergency responder sa Barangay Adlaon nga gipangulohan ni Konsehal Lee Gabud, mao ang unang nakaresponde sa aksidente.
Sumala pa, ang ang mga batan-on gikan nag-camping sa Sitio Masaba, Barangay Tagba-o, dakbayan sa Sugbo.
Sa follow up sa Superbalita sa Police Station 13 pinaagi ni Police Corporal Jeffrey Llamedo, nahibaw-an nga ang lima mga estudyante sa Indiana Aeronotics School sa siyudad sa Lapu-Lapu.
Padung na pauli ang lima gikan nag-camping diin pagtungas sa dalan sa dapit, napagngan kini sa makina hinungdan nga wala na makaprino ug nahulog sa bung-aw nga dunay igong gilawmon.