Usa ka 63-anyos nga mananagat ang gisikop niadtong Oktubre 16, 2024, tungod sa pasangil nga iyang gihilabtan ang 5 anyos nga kindergarten nga estudyante sa Purok 1 Lilium, Sityo Capayawan, Barangay Colon, Dakbayan sa Naga.
Ang pagdakop nahitabo mga alas 1:15 sa hapon, Miyerkules, Oktubre 16 atol sa usa ka hot pursuit.
Ang 29 anyos nga inahan sa bata maoy mi-report sa kapulisan aron sa pagdakop sa suspek nga silingan ra sab nila.
Ang suspek nga giila sa alyas nga "Cris" positibong gitudlo sa inahan nga maoy mihilabot sa iyang anak.
Si Police Corporal Amalia Sarucam, gikan sa Women’s and Children Protection Desk (WCPD) sa Naga City Police Station, mipadayag sa Superbalita Cebu nga ang inahan misumbong sa insidente ug giingon nga ang suspek mi -abuso sa iyang anak.
Ang bata misugid sa iyang inahan niadtong Martes sa gabii, Oktubre 15, nga gihilabtan siya sa suspek.
Matod pa ni Corporal Sarucam, ang bata mipahayag nga nagduwaduwa siya dapit sa basketball court sa dihang gipakuyog siya sa suspek paingon sa payag niini. Giingong misaad ang suspek nga hatagan siya og pagkaon, apan sa pag-abot sa payag, gihilabtan ang biktima.
“Ang bata miingon nga ang suspek nag-invite kaniya nga adunay ihatag nga pagkaon. Pag-abot sa payag, giingon nga gipasulod sa suspek ang iyang tudlo sa kinatawo sa bata,” matod ni Corporal Sarucam.
Nasayran usab nga nakainom si Cris atol sa hitabo.
Ang suspek mihimakak sa mga pasangil batok kaniya. Samtang ang bata gipahiling sa Pink Room sa Vicente Sotto Memorial Medical Center (VSMMC) alang sa medical examination ug evaluation.
Ang kapulisan nag-andam na sa pagpasaka og kaso batok sa suspek ubos sa Anti-Rape Law of 1997 (RA 8353). / GPL