Tungod sa giingong iyang kalagot sa iyang ama-ama, giingong gipatay sa 14-anyos nga batang lalaki ang iyang 5-anyos nga half-brother niadtong Biyernes sa buntag, Mayo 10, 2024 sa sityo Lawis, Brgy. Suba-Basbas, dakbayan sa Lapu-Lapu.
Giingon nga gitirador ang nawong, dayon gilumsan ug gitungtungan og bato ang lawas sa manghod aron di molutaw sa dagat.
Nahitabo kini mga alas 9 sa buntag sa Biyernes, apan nataho mga ala 1 na sa hapon kay wa pa nasayod ang inahan sa tinud-anay nahitabo sa iyang anak.
Ang suspek na-rescue sa kapulisan sa Lapu-Lapu City Police Station 4 nga gipangulohan ni P/MSgt. Marven Saraum, ubos sa kamanduan sa ilang station chief nga si P/ Maj. Judith Besas.
Sa interview sa Superbalita Cebu kang Rodel Largo, 27 , ulitawo, amahan sa biktima, siya niingon nga ang suspek anak sa iyang kapuyo sa lain nga lalaki. Ang amahan niini maoy unang kapuyo sa iyang live-in partner.
Matod niya nga gidala sa suspek ang 8 anyos niya nga anak ug ang manghod nga biktima sa dagat sa ilang dapit. Ang duha ka mga bata iyang mga anak.
Samtang didto sa baybayon, gitirador sa suspek ang baba sa biktima ug di pa igo, gilumsan sa dagat ug gipatungan og bato aron di molutaw ang lawas.
Ang tibuok hitabo nasaksihan sa 8-anyos nga igsuon.
Matod niya nga gihulga sa 14-anyos ang igsuon nga 8 anyos nga di magsaba, di mosulti ni bisan kinsa aron di isunod sa pagpatay.
Apan ang 8 anyos niyang anak nisumbong ngadto sa ilang inahan nga si Maricel ug didto na naugkat ang lawas sa biktima.
Sa sinugdan, wa pa mahibaw-i sa pamilya nga ang biktima gipatay sa maguwang tungod kay wa dayon nisulti ang 8-anyos tungod sa kahadlok sa suspek.
Ang suspek didto na ma-rescue sa kapulisan sa Brgy. Gabi, Lungsod sa Cordova.
NASUKO
Matod ni Largo nga ang suspek nasuko kaniya kay iyang gisigihan og palayas sa ilang balay kay grabe ka kawatan.
Didto ang kasuko sa suspek gipahimungot sa iyang half brother. Ang suspek, gumikan kay 14 anyos pa, igo ra una nga ikustodiya kay ubos sa balaud, di pa kini mahimo nga pasakaan og kaso.
Naa siya sa kustodiya sa Dept. of Social Welfare and Development (DSWD).