5 anyos nga kaluha nangalumos sa pool

Ang mga rescue personnel ug kapulisan sa lungsod sa Cordova daling ningdala sa managkaluha nga nangalumos sa swimming pool sa usa ka subdivision sa lungsod niadtong Dominggo sa hapon. /TAMPO
Ang mga rescue personnel ug kapulisan sa lungsod sa Cordova daling ningdala sa managkaluha nga nangalumos sa swimming pool sa usa ka subdivision sa lungsod niadtong Dominggo sa hapon. /TAMPO

Kaluha nga nagpangidaron og 5 anyos nga pulos lalaki nangalumos sa swimming pool sa usa ka subdivision sa Brgy. Gabi, lungsod sa Cordova, alas 3:40 sa hapon sa Dominggo, Nobiyembre 26, 2023.

Sa interbyo sa Superbalita Cebu sa kapulisan sa Cordova nga gipangulohan sa ilang hepe nga si Police Maj. Michael Gingoyon, ang uyoan sa kaluha maoy nitaho bahin sa hitabo.

Mga ngan sa mga biktima ug ngan sa subdivision gipugngan ning mantalaan tungod sa hangyo sa mga hingtungdan.

Asoy sa uyoan ngadto sa kapulisan, ang duha ka mga bata nagduwa-duwa og bola sa plaza sa subdivision.

Giingong kalit ang hitabo ug ilang nabantayan nga ang bola naglutaw na sa swimming pool uban sa duha ka mga bata.

Kapulisan nagtuo nga ang bola niuntol sa swimming pool ug gikuha sa managkaluha apan nahulog sila sa tubig.

Way dayoy nakabantay sa hitabo hinungdan sa pagkalumos.

Ang kaluha gidali sa pagtabang mga sakop sa Cordova Municipal Disaster Risk Reduction and Management Office ug gidala ngadto sa usa ka pribadong ospital sa siyudad sa Lapu-Lapu apan pipila ka oras, nangamatay ang magsuon.

Matod pa, dunay gibutang nga pahibalo ang management sa subdivision nga ‘walay lifeguard’ ug responsable ang matag usa o pamilya nga mangaligo sa swimming pool.

Nasayran sa Superbalita Cebu nga ang kapulisan sa Cordova mohimo unta og dugang pakisusi sa sulod sa subdivision, apan giingong wala una gipasulod sa asosasyon sa homeowners tungod sa ilang pagbangutan sa hitabo.

Dugang nasayran nga nagtigom ang asosasyon nga buot una og privacy sa ilang dapit labi na sa mga sakop sa media.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph