Naluwas sa tino nga kamatayon ang managsuong Miñoza human miulbo ang kayo nga nikaon sa ilang panimalay sa Purok 4 Upper, Barangay Kamputhaw, dakbayan sa Sugbo, alas 9:28 sa buntag, Miyerkules, Hunyo 26, 2024.
Matod sa apohan sa maong mga bata nga si Apolonia Miñoza Heredia, didto sa ikaduhang andana natulog ang iyang duha ka mga apo nga nagpangidaron og 15 ug 16 anyos.
Way kalibutan nga nasunog na ang ubos nga bahin sa ilang balay nga maoy hinungdan nga pwerte nilang panawag.
Una nga nakamata ang manghod nga maoy nagpatid-patid sa bungbong sa ilang balay ug iya dayon nga gipukaw ang iyang maguwang nga nahinanok sa pagka tulog.
“Iyang gipatid-patiran ang iyang maguwang kay pamatahon niya ba kay natug man na,” matod ni Apolonia.
Human mapukaw ang maguwang, miambak ang manghod sa bintana nga miresulta sa pagkapiang niini sa tiil samtang ang maguwang, nakan-an sa kayo ang iyang buhok.
Gidala ang duha sa mga sakop sa Cebu City Disaster Risk Reduction and Management Office sa tambalanan aron mahiling kon unsay kadaot nga ilang naangkon.
Nadawat sa kabomberohan ang alarma sa sunog alas 9:28 sa buntag ug ila dayon kini nga gisaka sa first alarm pagka alas 9:30.
Napaubos sa under control ang kayo pagka alas 9:56 ug hingpit nga napawong ang kayo sa alas 10:08 sa buntag.
Lima ka panimay ang apektado sa sunog apan duha lang niini ang hingpit nga naugdaw samtang ang tulo partially damage.
Lima ka pamilya ug 18 ka individual ang apektado sa sunog nga maoy miokupar sa maong panimalay.
Nagsugod matod pa ang kayo sa panimay ni Apolonia Heredia nga giokupar ni Lemer Vismanos.
Gibanabana sa Cebu City Fire Department nga moabot ngadto sa P264,000 ang danyos sa maong sunog.
Apan alang ni Heredia, dili sa ilaha nagsugod ang kayo kay nakita niya nga ang iyang mga silingan nga naa sa sudlonon mao may unang nanggawas nga nagpasabot dili sa ilaha naggikan ang kayo.
“Katong sa sulod, niuna man og gawas, nangayo og tabang kay naay sunog, sa ato pa didto siguro sa ilaha nag- una kay nangayo man sila og tabang,” matod ni Heredia.
Si Ramonito Del Campo, usa sa mga residente nga naapil pagkasunog ang iyang balay, nagkanayon nga dali kaayo nga nakakatap ang kayo tungod kay pulos light materials ang dapat sa mga balay.
“Dali naugdaw, Sir, kay light material man gud. Nakita nako ang aso kusog kaayo gyud nya nisubay nani sa kuryente nagbuto-buto mao to naapil amoa,” asoy ni Del Campo.
Misuway pa siya'g pawong sa kayo pinaagi sa paggamit sa ilang fire extinguisher apan wala na madala tungod sa kakusog sa kayo ug naapil gyud ang iyang balay. / AYB