Lima ka mga balay ang nangaugdaw sa sunog nga niigo sa Barangay Balud, lungsod sa Dalaguete, habagatang Sugbo alas 11:20 sa buntag sa Huwebes, Disyembre 14, 2023.
Ang kapulisan sa Dalaguete ubos sa pagpangulo ni Police Maj. Clemente Ceralde Jr. nakadawat sa maong alarma sa sunog ug daling nitubag uban sa kabumberohan sa lungsod.
Ang mga balay nga nasunog gipanag-iya nila ni Dominciana Agitong Belda, Cornelia Besin Belda, Lucilo Ambrad Belda, Romualdo Belda, ug Hilarion Salonoy.
Sa pasiunang imbestigasyon pinaagi sa saksi nga si Guilermo Agitong Belda nga samtang diha siya sa sulod sa iyang balay, nakamatikod siya og aso nga gikan sa balay ni Domenciana Belda.
Matod niya, dali siya’ng nigawas ug nisinggit kini og tabang sa dihang nagkayo na ang balay ni Domenciana.
Ang kayo daling nikatap sa mga silingang kabalayan nga kasagaran ginama sa light materials.
Atol ning pagsuwat, nagpadayon pa ang imbestigasyon sa kabumberohan sa Dalaguete bahin sa naasoy nga sunog.