Moabot na sa 39 ka mga barangay sa Dakbayan sa Sugbo ang gideklarar nga drug cleared human nga laing lima ang nakapasar sa gihimong validation, verification ug deliberation sa Regional Oversight Committee on Barangay Drug Clearing nga gipangunahan sa Philippine Drug Enforcement Agency (PDEA) 7 sa Huwebes, Mayo 22, 2025.
Ang lima ka mga barangay nga bag-ong gideklarar nga drug cleared mao ang Pahina San Nicolas, T. Padilla, PoblaciĆ³n Pardo, Bonbon, ug Bulacao.
Matod ni Jona John Rodriguez, pangulo sa Cebu City Office for Substance Abuse Prevention (Cosap) nga gipaubos sa lisod nga proseso ang maong lima ka mga barangay tungod sa kadaghan sa mga requirement nga gipangayo nga angayan nga i-submit.
Usa sa mga rekisitos nga mamahimong drug cleared ang usa ka barangay mao nga kinahanglan nga ang tanang drug personality nga naa sa watchlist na account ug napaubos sa Community Based Drug Rehabilitation Program ug human ani, ipaubos na sab sila sa after care program ug ang lima ka barangay ang nakahimo niini.
Sa sunod buwan, laing unom pa ka barangay ang kandidato nga mahimong drug cleared nga mapaubos sa validation ug deliberasyon nga gituohan nga makapasar usab, matod ni Rodriguez.
Dunay usa ka barangay nga wala maapil ug gi-defer lang una ang application human masayran nga ang usa ka drug personality nga nibalhin na sa laing lugar apan naa pa ang ilang balay niini.
Si Cebu City Outgoing Ma-yor Raymond Alvin Garcia nga nitambong sa deliberation ug pagkadeklarar nga mahimong drug cleared ang lima ka barangay, nalipay sa resulta tungod kay iyang giangkon nga lisod kaayo ang pagkab-ot niini ilabi na nga ang dakbayan usa ka highly urbanized ug problema gyud ang ilegal nga drugas.
Taliwa niini, 39 na ka barangay ang na-drug cleared ug masaligon ang mayor nga mapun-an pa kini sa mosunod nga buwan.
Niingon si Garcia nga nagpasabot lang kini nga naningkamot ang mga tinugyanan sa balaod ug ang barangay officials nga malimpyuhan sa ilegal nga drugas ang ilang lugar.
Nipasabot sab si Rodriguez nga ang pagdeklarar sa usa ka barangay nga drug cleared nga mawagtang na ang pagkatap sa ilegal nga drugas apan mamahimong mapugngan na nga makasulod pagbalik ang suplay sa maong barangay.
Matag buwan mo-report ang barangay ngadto sa PDEA 7 ug sa Cosap kon mibalik ba sa ilang naandan nga bisyo ang mga drug personality o kon dunay bag-ong nisulod nga drug player.
Apan kon magpasagad ang mga barangay official sa ilang status ug kon dunay bag-ong nisulod nga drug personality ug nibalik ang mga naa sa watchlist sa pagpayuhot sa ilegal nga drugas, mawagtangan kini sa drug cleared status. / AYB