Gihinganlan ni Presidente Ferdinand ‘Bongbong’ Marcos Jr. niadtong Lunes, Agosto 11, 2025, ang lima ka kompaniya sa construction nga nakakuha sa hapit tanang proyekto sa flood control sa kagamhanan sa nagkalainlaing rehiyon sa nasod.
Sa usa ka press conference, gibutyag ni Marcos nga gikan niadtong Hulyo 2022 hangtod Mayo 2025, ang kagamhanan nakahimo og kinatibuk-ang 9,855 ka proyekto sa flood control sa tibuok nasod nga nagkantidad og P545.64 bilyunes.
Ang mga kompaniya nga adunay labing daghang kontrata sa flood control gikan sa 2,409 ka kontraktor sa gobiyerno:
Legacy Construction Corporation
Alpha & Omega Gen. Contractor & Development Corp.
St. Timothy Construction Corporation
QM Builders
EGB Construction Corporation
Topnotch Catalyst Builders Inc.
Centerways Construction and Development Inc.
Sunwest, Inc.
Hi-Tone Construction & Development Corp.
Triple 8 Construction & Supply, Inc.
Royal Crown Monarch Construction & Supplies Corp.
Wawao Builders
MG Samidan Construction
L.R. Tiqui Builders, Inc.
Road Edge Trading & Development Services
Gipasabot ni Marcos nga sa P545 bilyunes nga pundo alang sa flood control, kapin sa 20 porsiyento o P100 bilyunes ang gi-award ngadto sa 15 ka kompaniya.
Sa maong 15 ka kompaniya, lima — ang Legacy Construction Corporation, Alpha & Omega Gen. Contractor & Development Corp., St. Timothy Construction Corporation, EGB Construction Corporation, ug Road Edge Trading & Development Services — adunay proyekto sa halos tanang rehiyon sa nasod nga nakapaduda sa presidente.
Base sa iyang kasinatian isip kanhi gobernador, gipasabot ni Marcos nga kasagaran ang mga lokal nga kagamhanan mopili og lokal nga kontraktor alang sa mas paspas ug personal nga koordinasyon.
“Ang justification sa pagpili ng kontratista ay para sasabihin pagbigyan naman natin ‘yung local para naman ‘yung maliliit na contractor may trabaho naman sila, mas mabilis kasi kung local, kausap mo ‘yung tao. Again, my experiences as governor, as much as possible we try to do it local kasi pwede naming sabihin bilisan n’yo na, you have some influence over the thing,” nagkanayon si Marcos.
Gipadayag sab sa presidente nga 6,021 sa 9,855 ka proyekto nga nagkantidad og P350 bilyunes walay klarong pagpasabot sa klase sa estruktura nga gitukod, giayo, o girehabilitar.
Daghang proyekto sab nga “copy-paste” ang disenyo ug kantidad bisan sa managlahi nga lokasyon ug terrain.
“I think anybody who works either in the private or public sector, ‘pag sinabi may 50 projects, pare-pareho P150 million lahat impossible yan. It is impossible for one barangay, even if they are the next barangay, to have the exact same project, to have the exact same amount with the exact same contractor. Impossible ‘yan,” dugang pa ni Marcos. /