Nakarekord ang Philippine National Police (PNP) og lima ka gituohang election-related incidents (ERIs) nga adunay kalambigitan sa May 2025 national ug local elections (NLE).
Sa radio interview niadtong Sabado, Enero 25, 2025, si PNP chief of the Public Information Office (PIO) Colonel Randulf Tuaño niingon nga ang gidudahang ERIs narekord sa Western Visayas, Cagayan Valley, ug Soccsksargen.
“Yung tinatawag nating election-related incidents, meron tayong datos na nakuha na ERIs pero hindi pa ito confirmed. Ito ay nanggaling sa Region 2 (Cagayan Valley) meron tayong isa, meron tayo sa Region 6 (Western Visayas) na tatlo at Region 12 na isa. Kasi [kandidato] itong mga taong involved kaya sinasabi na suspected na ERIs,” matod ni Tuaño.
Sa laing bahin, nagkanayon si Tuaño nga taliwala sa implementasyon sa gun ban isip tipik sa mga lakang aron maseguro ang kahapsay ug kalinaw sa umaabot nga NLE, niabot gihapon sa 379 ka mga tawo ang nangadakpan diin 400 ka mga armas ang nakuha sa kapulisan.
Ang nangadakpan naglakip og civilians, security guards, mga miyembro sa law enforcement agencies, ug government officials.
Gipasakaan sila og mga kasong kalapasan sa Omnibus Election Code.
Base sa Comelec Resolution 11067, ang aduna ra’y certificate of authority mao ang tugotan nga makadala og armas sa gawas sa ilang mga panimalay atol sa gun ban nga gipabrubahan sa Committee on the Ban on Firearms and Security Concerns.
Ang PNP nagpahigayon og Comelec checkpoints aron ipatuman ang gun ban atol sa election period nga basi sa Comelec Resolution 10999, nagsugod niadtong Enero 12 ug mahuman hangtod sa Hunyo 11 ning tuiga.
Ang 90-day campaign period alang sa mga senador ug party-list representatives magsugod karong Pebrero 11 hangtod sa Mayo 10, samtang ang campaign period sa local candidates magsugod karong Marso 28 hangtod sa May 10, 2025. / TPM / SunStar Philippines