Upat ka opisyal sa kapulisan ang ginganlan sa Philippine National Police (PNP) nga posible nga mopuli sa puwesto ni PNP Chief Rommel Marbil.
Sa usa ka press conference, gibutyag ni PNP Public Information Office (PIO) Chief Colonel Randulf Tuaño nga base sa seniority, ang sunod nga mga posibleng mahimong punoan sa kapulisan mao sila Deputy Chief for Administration Police Lieutenant General Jose Melencio Nartatez Jr., Deputy Chief for Operations Police Lieutenant General Robert Rodriguez, ug Chief Directorial Staff Police Lieutenant General Edgar Alan Okubo.
Dugang pa niya nga sila si Criminal Investigation and Detection Group Director Major General Nicolas Torre III ug National Capital Region Police Office (NCRPO) Anthony Aberin mga kandidato sab alang sa maong puwesto.
Bisan pa, matod ni Tuaño nga bisan kinsang one-star general sa kapulisan mahimong mapili isip sunod nga lider sa PNP.
Mahimo sab nga mosumite ang National Police Commission og lista sa mga ngalan nga irekomenda ngadto ni Presidente Ferdinand “Bongbong” Marcos Jr.
Lakip sa lima ka kandidato si Rodriguez ang labing dali nga moretiro sa Hulyo 2025. Sila si Nartatez ug Okubo pulos miyembro sa Philippine Military Academy Tanglaw Diwa class of 1992.
Sila si Aberin ug Torre mga miyembro sa Philippine National Police Academy (PNPA) Tagapagpatupad class of 1993.
Si Nartatez kinsa gikatakdang moretiro niadtong Marso 2027, kanhi nagsilbi isip director sa Police Regional Office 4A o Calabarzon, National Capital Region Police
Office (NCRPO), Directorate for Comptrollership ug ingon man Directorate for Intelligence.
Si Okubo nagsilbi sab nga hepe sa NCRPO ug direktor sa Special Action Force (SAF), PNP-Civil Security Group, Intelligence Division ug Police Community Relations.
Sa usa ka interbyu sa mga tigbalita, si Marbil kinsa ang termino sa pagpalugway matapos sa Hunyo 7, nagkanayon nga naglaum siya nga ang mga reporma ug kalamboan sulod sa pwersa sa kapulisan magpadayon ubos sa pagpangulo sa mopuli kaniya. / TPM