Lima ka mga sakop sa pamilya ang naangol human ang sports utility vehicle (SUV) nibangga sa naghunong nga dump truck sa national highway sa Purok Saging, Brgy. Tacup, lungsod sa San Remigio, alas 2 sa hapon, Sabado, Marso 23, 2024.
Ang mga sakyanan nga nalambigit sa aksidente mao ang dump truck nga gimaniho ni Roldan Narandan, 40, minyo ug taga Panugnawan, lungsod sa Medellin Sugbo.
Samtang, ang SUV nga Toyota Hilux gimaniho ni Ernesto Bandolon, 71, minyo, retired seaman ug taga Purok Atis, Brgy. Kinawahan, San Remigio nga naangol.
Lakip sa naangol mao ang iyang asawa nga si Carmencita Bandolon, 70, ug sila si Ashley, 21, dalaga, estudyante; Alexander Luis, 10, estudyante; ug Catherine, 41, usa ka overseas Filipino worker (OFW).
Ang Superbalita Cebu nisubay sa imbestigasyon sa kapulisan sa San Remigio Municipal Police Station ubos sa kamanduan sa ilang hepe nga si Police Capt. Phil Restauro.
Nasuta nga ang Toyota Hilux nga gimaneho ni Ernesto Bandolon, ang nagsubay sa national highway gikan sa siyudad sa Bogo ug pag-abot sa Purok Saging sa Tacup, San Remigio, aksidente kining nibangga sa nag-parking nga dump truck nga niresulta sa pagkaangol ni Ernesto ug sa iyang mga sakay.
Ang mga biktima gidali sa pagtabang sa mga sakop sa emergency medical staff (EMS) sakay sa ambulansiya ngadto sa tambalanan.
Way taho sa kapulisan nga dunay grabe sa lima nga nangaangol. / DVG