Lima na ka underwater drone ang narekober sa lainlaing bahin sa nasod, sumala sa tigpamaba sa Philippine Navy para sa West Philippine Sea (WPS) nga si Rear Admiral Roy Vincent Trinidad.
Sa usa ka press briefing, gibutyag ni Trinidad nga duha ka underwater drones ang narekober sa Calayan Island; usa sa Pasuquin, Ilocos Norte; usa sa Initao, Misamis Oriental; ug ang pinakabag-o nga nadiskobrehan sa San Pascual, Masbate.
“We have already recovered five of these. The reports were given to us by our fishermen. And it’s difficult to detect these drones underwater but when they’re on the surface, they become visible,” matod ni Trinidad.
“They get picked up by our fisherfolk and they report to the police and then eventually to the Philippine Navy,” dugang niya.
Gipasabot ni Trinidad nga ang tanang narekober nga unmanned underwater equipment giagi og forensic examination.
Matod niya, base sa resulta sa eksaminasyon nga gihimo sa underwater drone nga narekober sa Calayan Island, kini nga mga kagamitan gidisenyo aron mangolekta og mathematical data, partikular na ang salinity, oxygen level, ug temperatura sa tubig.
“This information will have commercial value. It will have academic value. With the criss-crossing of information right now, it could also have military purposes and applications,” miingon si Trinidad.
Ang pinakabag-o nga submarine drone nga adunay marka nga “HY119” gipunit sa mga mangingisda sa kadagatan sa San Pascual, Masbate, niadtong Disyembre 30.
Gituohan sa mga awtoridad nga gipanag-iya sa China ang maong mga kahimanan.