Lima ka mga mag-uuma nga giila nga most wanted person sa tibuok Central Visayas (CV) nga dunay mga pending warrant of arrest sa kasong attempted murder ug murder ang nasikop sa Criminal Investigation and Detection Group 7-Negros Oriental Provincial Field Unit alas 8:20 sa gabii, Miyerkules, Pebrero 12, 2025 sa Barangay Nabinlod, Lungsod sa Sta. Catalina, Negros Oriental.
Ang mga nasikop mao sila si Felix Paraiso Diginion alyas Felix Deguinion, 64, Renato Lariosa Mariño, 45, Daniel Abugan Alasan, 55, Julian Diginion Dela Cruz, 36, ug Angelito Delosario Dela Cruz, Sr., 50, pulos taga Sitio Cogon, Barangay Nabinlod.
Ang lima dunay tulo ka warrant of arrest sa kasong murder nga walay gitugot nga piyansa ug nabutang sila isip number 4 Regional Most Wanted Person.
Duna sab silay kasong duha ka attempted murder nga dunay piyansa nga P120,000 ang matag usa nga giluwatan ni Honorable Judge Maria Myla Rae Santos-Orden, ang Presiding Judge sa RTC Branch 63 sa Dakbayan sa Bayawan, Negros Oriental, pinetsahan niadtong Pebrero 5, 2025.
Ang mga akusado gi-turnover sa CIDG Negros Oriental Provincial Field Unit ngadto sa korte nga maoy nag-isyu sa warrant of arrest ug kasamtangan nga gikustodiya sa temporary custodial facility sa Dumaguete City Police station.
Ang lima gipasakaan og lima ka mga kasong attempted murder ug murder human sa nahitabong pagpamusil sa Barangay Nabinlod sa miaging tuig gumikan sa away sa yuta nga niresulta sa kamatayon sa usa ka tawo ug pagkaangol sa laing duha. / AYB