Naluwas sa City Disaster Risk Reduction and Management Office (CDRRMO) sa Siyudad sa Lapu-Lapu ang lima ka mga tawo gikan sa bangka nga natikyaob tungod sa dagkong balod sa lawod sa Barangay Maribago, alas 2:13 sa hapon, Lunes, Septiyembre 16, 2024.
Ang naluwas naglakip sa kapitan sa bangka ug mga sakay niini nga sila si Eleno Patigdas, 57, ug Melchor Aciano, 51, pulos taga Suba Basbas sa Lapu-Lapu, usa ka nagngalan og ‘Nilo’, usa ka ‘Orlando’ ug laing usa ka hamtong na wa makuha ang pangan.
Sumala sa taho, ang Coast Guard Substation sa lungsod sa Cordova maoy unang nakamatikod sa naunlod nga bangka.
Sa pagsusi sa mga sakop sa Coast Guard, ilang naabtan ang Sea Breeze nga bangka nga nasudlan og tubig apan wala kini malunod ug ang mga sakay niini gipabalhin sa rubber boat nga gipanag-iya sa Team Z Water Sports.
Sa pasiunang imbestigasyon nasuta nga ang maong bangka nga dunay sakay nga lima ka mga tawo gikan sa isla sa Brgy. Caubian Island, Lapu-Lapu nianang alas 11:30 sa buntag nga padung sa Brgy. Suba Basbas sa mainland sa Lapu-Lapu.
Matod pa, nga ang bangka nakasinati og pagkadaut sa makina sa lawod sa Maribago ug tungod sa dagkong bawod uban sa kakusog sa hangin nga habagat, nasudlan ug nakapawan og tubig apan wa malunod tungod kay duna kini katig ug gaan usab ang bangka. / DVG