GIBUTYAG sa National Disaster Risk Reduction and Management Council (NDRRMC) niadtong Lunes, Hulyo 21, 2025, nga niabot na sa lima ang nangamatay tungod sa epekto sa habagat (southwest monsoon) ug Severe Tropical Storm Crising.
Sa situational report, giingon sa NDRRMC nga duha sa mga biktima gikan sa Matin-ao, Surigao del Norte ug Mambajao, Camiguin. Ang duha natumbahan og kahoy.
Giklaro sab sa ahensiya nga ang laing tulo nga gi-report nga namatay sa Northern Mindanao ug Davao Region gipaubos pa sa imbestigasyon ug adunay gikataho nga pito ka indibidwal ang gikatahong missing.
Sumala sa datos sa NDRRMC, nisaka sa 225,985 ka pamilya o 800,864 ka tawo ang apektado sa 1,556 ka barangay sa nagkadaiyang rehiyon sa nasod.
Sa maong gidaghanon, hapit 6,000 ka pamilya o sobra 20,000 ka tawo ang kasamtangang nahimutang sa mga evacuation center.
Kapin P50 milyunes nga kantidad sa hinabang—lakip ang pagkaon ug non-food items ang gipang-apudapod ngadto sa mga apektadong komunidad.
Nakarekord sab ang ahensiya og 299 ka totally destroyed nga mga balay ug 935 nga partially damaged nga mga panimalay sa mga apektadong rehiyon.
Ang infrastructure sector nitala og P220 milyunes nga kantidad sa kadaot.
Ang epekto sa habagat ug Bagyong Crising niigo sa kadaghanang mga rehiyon sa Pilipinas niadtong miaging semana nga nisangpot sa pagbaha sa daghang komunidad. / TPM / SunStar Philippines