5-pt. play ni Bolick nakatabla
Nakakompleto og five-point play si Robert Bolick sa nahabiling 17.8 segundos aron pangulohan ang Team Mark nga makatabla sa Team Japeth, 140-140, sa Philippine Basketball Association (PBA) Season 48 All-Star Game niadtong Dominggo sa gabii, Marso 24, 2024, sa University of Saint La Salle gym sa Bacolod City.
Aduna pa unta’y igong oras ang Team Japeth nga maangkon ang kadaugan apan nasipyat ang bag-ong Three-Point King sa PBA nga si Calvin Oftana sa pag-itsa dungan sa final buzzer.
Si Bolick, kinsa bag-ong pambato sa NLEX Road Warriors, igo lang nakamugna og 13 puntos apan 10 niini iyang nahimo sa katapusang quarter nga gibuwakan og duha ka krusyal nga four-pointers.
Adunay higayon nga nalubong ang Team Mark og 32 puntos apan hinayhinay silang ninggukod hangtod nga ilang naposte ang labing unang panagtabla sa All-Star Game gikan niadtong 2017.
Ning panagtabla, nakadesisyon ang PBA Board nga premyuhan ang duha ka mga kampo og P150,000 matag usa.
“Akala ko wala na talaga kami. Thirty seconds, parang lamang ata sila ng siyam? E, ganun talaga. Bilog ang bola,” matod ni Bolick, kinsa napiling co-MVP kauban si Japeth Aguilar.
Nahimo'ng kompetensya ni Bolick sa MVP award ang iyang kauban nga si CJ Perez, kinsa maoy nangulo sa Team Mark pinaagi sa iyang 39 puntos.
Apan tungod sa pagkamahinungdanon sa nahimo ni Bolick, siya ang napili sa pasidungog.
Si team captain Mark Barroca nidugang og 18 puntos samtang niamot og 17 puntos si June Mar Fajardo alang sa Team Mark.
Ang Team Japeth gipangulohan ni Roger Pogoy pinaagi sa iyang 25 puntos, nidugang og 24 puntos si Marcio Lassiter samtang nihatag og 21 puntos si team captain Aguilar.
Nagtabla sab ang Team Mark ug Team Japeth sa tradisyunal nga dance contest sa All-Star Game. Nakadawat sab og tag P150,000 ang duha ka mga kampo.
Puntos matag usa:
Team Japeth (140) - Pogoy 25, Lassiter 24, Aguilar 21, Malonzo 17, Tolentino 13, Romeo 11, Lee 9, Newsome 7, Oftana 7, Trollano 2, Pringle 2, Dionisio 2, Ahanmisi 0.
Team Mark (140) - Perez 39, Barroca 20, Abueva 18, Fajardo 17, Rivero 15, Bolick 13, Perkins 9, Tiongson 3, Jalalon 2, Hodge 2, Sangalang 2, Norwood 0, Castro 0, Yap 0, Pinto 0. / ESL