NANGADAKPAN ang lima ka mga lalaki human nakuhaan og ilegal nga drugas sa managlahing operasyon sa Oplan Bulabog mga alas 12:00 pasado sa tungang gabii, Agusto 7, sa Barangay Mambaling, Dakbayan sa Sugbo.
Unang nangadakpan mga alas 12:05 mao sila si alyas Poloy, 37, walay trabaho ug residente sa Sitio Kalubihan, Barangay Sambag 1,Cebu City ug ang kauban niini nga usa ka call center agent nga si alyas Marx, 27 ug lumulupyo sa Barangay Lagtang, Dakbayan sa Talisay.
Gikataho nga nasikop ang duha sa may YbaƱez Compound, Barangay Mambaling, ug naaktuhan sa kapulisan nga naghupot og 11 ka mga gagmayng pakete sa gituohang shabu hinungdan nga sila gidakop.
Mga alas 12:50 sa Sityo Kahuyan, Barangay Mambaling, wala usab kaipsot ang tulo ka mga lalaki nga sila si alas Jirod, 30 ug ang silingan niini nga si alyas Babadz, 25, taga Dakbayan sa Mandaue ug ang laing kauban niini nga si alyas Randy, 43 ang panuigon nga residente sa Barangay Mambaling.
Ang tulo nakuhaan og 8 ka gagmayng pakete sa gituohang ilegal nga drugas nga motimbang og .40 ka gramos nga mobalor og P2,720. / JDG
