50-50: Japanese batok Suganob
Alang sa inilang boxing trainer sa Sugbo nga si Edito Villamor, 50-50 ang purohan sa panagharong nila ni Filipino world-rated Regie “The Filipino Phenom” Suganob (14-1, 4KOs) ug Japanese Kai Ishizawa (11-3, 10KOs) sa main event sa “Kumong Bol-Anon 15” boxing promotion karong Abril 30, 2024 sa Holy Name University (HNU) gymnasium sa Tagbilaran City, Bohol.
Ning maong away, depensaan ni Suganob ang iyang World Boxing Organization (WBO) Global light flyweight title.
“Nindot ni nga away kay pulos ni sila former world title challengers. Tan-aw nako, 50-50 ang chance, puwedeng matumba ni Reggie ang Hapon pero puwede sab matumba si Reggie,” matod ni Villamor, kinsa maoy matchmaker ning maong promosyon nga gipasiugdahan sa PMI Bohol Boxing Promotions.
Alang ni Villamor, nakabintaha si Suganob kon abilidad ang hisgutan apan delikado kini nga away alang sa usa sa mga pambato sa PMI boxing stable gumikan kay adunay saktong kusog si Ishizawa.
“Pareho silang naa’y maayong abilidad pero tan-aw nako, mas skillful si Reggie pero power puncher si Ishizawa. Nindot ni nga rivalry sa Japan ug Pilipinas,” dugang ni Villamor.
Ang promoter ni Suganob nga si PMI head Atty. Floriezyl Echavez Podot nisuporta sa panahom ni Villamor.
“Same preparation ra man gihapon ang gihimo ni Reggie pero nag-estudyo gyud na ang Japanese. Di gyud ta makasulti. Pero conditionining wise, ready na gyud ta,” matod ni Podot.
Sa co-feature sa promosyon, ang laing sakop sa PMI boxing stable nga si Shane “Sugar Shane” Gentallan makigbatok ni Indonesian Wandi Priman Hulu. Aduna pa’y dugang parisan ang masaksihan sa promosyon. / ESL