Mokabat sa 50 ka mga motorista ang nasikop sa Traffic Enforcement Agency (Team) sa Mandaue City tungod sa counterflow subay sa ilang random checkpoints sukad niadtong miaging semana.
Si Hyll Retuya, assistant department head sa Team, nipahibalo sa Martes, Marso 5, 2024, nga ilang gihimo ang mga lakang aron mapalig-on ang pagpatuman sa mga lagda sa trapiko sa dakbayan.
Matod ni Retuya, kadaghanan sa mga dinakpan adunay kalambigitan sa mga motorsiklo.
Alang sa confidentiality, nagdumili siya pagbutyag kon asa nga kadalanan ang adunay checkpoints aron dili makalikay ang mga motorista sa mga lugar.
Matod ni Retuya nga ang maong lakang kabahin sa ilang padayon nga pagpaningkamot aron masiguro ang kaluwasan sa kadalanan ug mamenosan ang mga kalapasan sa trapiko.
Tungod sa ilang mga paningkamot, siya miingon nga ang gidaghanon sa mga nag-counterflow nga mga sakyanan nikunhod, bisan pa adunay ilang nadakpan nga mga malapason. Iyang giawhag ang mga motorista nga dili i-normalize ang pag-counterflow apan mas maayong modumala sa ilang oras aron makaabot sa ilang destinasyon sa saktong oras.
TOP
Aron mapugngan ang pag-counterflow, ang Team moisyu og citation ticket nga dunay multa nga P1,000 alang sa bisan unsang sakyanan nga masakpang nakalapas sa lagda.
Matod ni Retuya nga ang bag-o lang gipahigayon nga random checkpoints gisuportahan sa Traffic Enforcement Unit (TEU) ug sa Highway Patrol Group (HPG) sa Philippine National Police.
Atol niini nga mga checkpoint, ang TEU ug HPG niisyu usab og Temporary Operator’s Permit (TOP).
Bisan og dili makahatag og saktong numero, gipasabot ni Retuya nga ang TOP nagpahamtang og mas dagkong multa kon itandi sa ordinaryong citation ticket.
Apil usab sa maong mga silot ang pagsakmit sa driver’s license nga mahimong ma-claim sa Land Transportation Office Central Visayas Office.
Gibutyag usab ni Retuya nga tinguha nila nga makig-alayon kanunay sa TEU ug HPG aron mapugngan ang mga motorista nga makahimo na usab og kalapasan sa trapiko sa ilang random checkpoint operations./ HIC