Moabot sa 50 ka mga police personnel gikan sa nagkalainlaing City ug Provincial Police Office sa Central Visayas ang gipadala sa Police Regional Office (PRO) 7 isip mga Special Electoral Board alang sa National ug Local Election sa Mayo 12, 2025, sa Bangsamoro Autonomous Region in Muslim Mindanao.
Gihimo ang send off ceremony sa Miyerkules sa buntag, Abril 30, 2025, sa parade ground sa PRO 7 sa pagpangulo ni Police Brigadier General Redrico Maranan, hepe sa kapulisan.
Matod ni Maranan nga ang PRO 7 motabang sa mga polis sa BARMM aron makab-ot ang kahusay, malinawon, patas ug matinud-anon nga piniliay sa maong rehiyon ug mahatagan og proteksyon sa ilang pagpili ang mga molupyo sa maong rehiyon.
Ang maong mga polis nga magsilbing Special Electoral Board gipaubos sa subsob nga pagbansay-bansay sa Commission on Elections.
Sila mismo ang niboluntaryo nga magpadestino sa dapit bisan pa man nga giila ang maong rehiyon nga usa sa labing angayan nga tutokan sa PNP ug AFP tungod sa mga insidente nga naglambigit sa nagsingabot nga eleksyon.
Sa 50 ka mga police personnel unom niini mga babaye nga nipakita og kaisog nga niboluntaryo nga ipadala sa Mindanao aron motabang sa election.
Gidayeg ni Maranan ang gipakitang kaisog sa maong mga polis bisan pa man nga sa sulod sa pila ka adlaw ilang mabiyaan ang ilang pamilya, kabanay, mga minahal sa kinabuhi ug higala dinhi sa Sugbo aron lang moserbisyo alang sa nasod. / AYB