Moabot na sa 50 ka mga miyembro sa 14 ka gun-for-hire groups nga naglihok sa Central Visayas ang nadakpan sa Police Regional Office (PRO) 7 gikan sa Enero 2025 hangtod na sa buwan sa Hunyo.
Kini subay sa subsob nga kampanya paggukod sa mga responsabli sa sunod-sunod nga kaso sa pagpamusil sa tibuok rehiyon.
Ang mga na-neutralize na nga mga gun-for-hire group naglangkob sa Nadera, Gido, Tañeza, Yllaya, Garciano, Ybañez, Marapoc, Manoy, Rusiana, Caballero, Bobong, Darryl, Llatona, ug Comaling.
Sa maong gidaghanon nga nadakpan sa kapulisan, walo niini giila nga mga lider sa grupo samtang 10 ka miyembro ang napatay sa nahitabong armed confrontations sa mga tinugyanan sa balaod.
Nakasakmit sab ang kapulisan og 27 ka nagkalainlaing kalibre sa armas atol sa operations nga gigamit sa gun-for-hire activities.
Ang padayon nga pag-ila ug pagbungkag sa mga illegal gun manufacturer maoy kasangkapan sa pagputol sa pagkatap sa mga armas ngadto sa maong grupo.
Sa nakuha nga impormasyon gikan sa komunidad, nagtug-an nga kadaghanan sa maong criminal organizations nagkuha sa ilang mga armas gikan sa mga hilit nga dapit sa Central Visayas.
Pipila kanila dunay connection niadtong nalambigit sa international arms trafficking nga maoy hinungdan nga wala molugak ang PRO 7 sa pagpangita kanila aron mapuhag ang ilang pagpayuhot sa mga ilegal nga armas.
Kini nga kalampuson nasubay sa kamanduan ni PNP Chief Police General Nicolas Torre III nga nagdasig sa kapulisan nga sumpuon ang pagpakatap sa loose firearms.
Si Police Brigadier General Redrico Maranan ang hepe sa Police Regional Office 7 nipasalig nga magpadayon ang ilang paghingusog batok sa mga kriminal nga naglihok sa Central Visayas alang sa siguridad sa katawhan.
“The neutralization of these gun-for-hire groups is very crucial to the safety and security of the residents in Central Visayas and even beyond. We will not rest until every syndicate is taken down and peace is fully restored in our communities,” matod ni Maranan.
Padayon ang gihimong intelligence operations ug surveillance aron pagtultol sa nahabiling sakop sa gun-for-hire group nga nailhan na sa kapulisan.
Gidasig sab ni Maranan ang publiko nga padayon nga magmabinantayon ug ipahibalo dayon sa kapulisan pinaagi sa pag-dial sa 911 hotline kon duna silay mamatikdan nga kadudahan sa ilang dapit aron nga mapadayon ang kahusay ug kalinaw. / AYB