Moabot sa 500,000 ka mga pasahero ang natala sa Cebu Port Authority (CPA) nga nibiyahe gikan ug paingon sa pwerto sa Sugbo atol sa Semana Santa ug taas nga bakasyon.
Base sa talaan sa CPA, anaa sa 281,994 ka mga pasahero ang nigikan sa pantalan sa Sugbo samtang 254, 445 ang niabot usab sa pantalan sa Sugbo atol sa Semana Santa atol sa taas nga bakasayon nga nagsugod sa Abril 13-20, 2025.
Matod ni Lieutenant Junior Grade Abel Jan Lomboy sa Philippine Coast Guard Central Visayas nga hapsay ug linaw ang pagbiyahe sa mga pasahero atol sa Semana Santa.
"All vessels and ports are compliant naman with our safety regulations, there were no issues or delayed reported sa amoa so the Coastguard District Central Visayas and the port authorities or mga manager support maintains strict oversight ensuring the smooth operation of semana santa," matod ni Lomboy sa Abril 21, 2025.
Hinuon, gidugang ni Lomboy nga usa ka roro vessel ang naasoy nga nasangad sa Lalawigan sa Bohol. Luwas hinuon ang tanang sakay niini ug naugkat na ang nasangad nga barko sa alas 2:00 sa hapon, Lunes, Abril 21, 2025.
Tungod sa taas nga higayon nga makasuroy ug makaligo sa dagat ang mga bisita ug turista, natala sab sa buhatan ang duha ka mga indibiduwal nga nalunod sa kadagatan sa Dakbayan sa Talisay, usa sab sa Dakbayan sa Sugbo ug duha nga na-missing sa kadagatan sa Dakbayan sa Bogo.
Bisan pa og nahuman na ang Semana Santa, gipasalig ni Lomboy nga padayon ang monitoring sa PCG sa tanang stations ug sub-stations niini ilabi na nga padayong modagsa ang mga mangaligo sa kadagatan.
"Back to normal alert na po kami however, nakatutok gihapon atong mga stations sa mga beachgoers para ma-prevent ang mga drowning incidents" dugang ni Lomboy./ANV