Nakasakmit ang kapulisan sa Central Visayas og 527 ka mga loose firearms sukad gihingusgan ang ilang operasyon subay sa nagsingabot nga midterm elections sa Mayo 12, 2025.
Sa datos sa Police Regional Office (PRO) 7, nakahimo na ang kapulisan og 15,528 ka checkpoints sa tibuok rehiyon sukad gipatuman ang Comelec gun ban niadtong Enero 12, 2025, nga niresulta sa pagkasikop sa 170 ka mga malapason.
Sa maong mga nadakpan, 96 niini ang nakalapas sa lainlain nga police operations, 45 sa drug-bust , 23 sa ubang law enforcement operations ug 6 sa Comelec checkpoints.
Samtang nakakuha sab ang PNP og 450 ka armas nga walay lisensya atol sa police operations, 47 ang buy-bust, 23 sa laing law enforcement operations ug pito ka armas ang naimbargo atol sa checkpoints.
Subay niini, gidayeg ni Police Brigadier General Redrico Maranan, hepe sa PRO 7 ang iyang mga police personnel nga nituman sa iyang kamanduan sama sa 24 oras nga checkpoints aron nga magpabilin nga malinawon ang tibuok Central Visayas atol sa piniliay.
“Our preparations are designed to prevent any disruption and to ensure that the elections are carried out in a peaceful, orderly, and secure manner. The 24-hour checkpoints, along with our other security measures, will help us monitor and prevent any illicit activities that could threaten the safety of our citizens or compromise the elections” matod ni Maranan.
Bisan walay natala nga election related incidents sa rehiyon, ang regular nga pagpatrolya, surveillance ug intelligence operations magpadayon aron nga mapugngan ang hulga sa seguridad.
Ang pagpakatap sa mga special unit sa kapulisan gitumong aron nga dali ang pagtubag sa bisan unsa nga emergency o dunay election related nga kagubot.
Si Maranan nitataw nga ang kalampusan sa luwas ug malinawon nga election mag-agad sa pagtinabangay sa kapulisan, Comelec ug mga ahensya sa gobiyerno ilabi na sa komunidad.
Tungod niini, giawhag ni Maranan ang publiko nga padayon nga magmabinantayon, tumanon ang balaod sa election ug proteksyonan ang ilang katungod sa pagpili sa responsableng pamaagi. / AYB