Moabot ngadto sa 532 ka mga tawo nga nakahimo’g lainlaing matang sa krimen nangadakpan sa Police Regional Office 7 (PRO 7) atol sa tulo ka adlaw nga Simultaneous Anti-Criminality and Law Enforcement Operations gikan sa Abril 19 ngadto sa 21, 2024.
Sa data nga gipahibawo ni Police Lieutenant Colonel Gerard Ace Pelare, spokesperson ni Police Brigadier General Anthony Aberin, hepe sa kapulisan sa Central Visayas, nga nakasikop sila og 225 ka mga tawo nga naatlan nga nagsugal sa tigbakay, hantak ug ang uban nalambigit sa illegal numbers game sama sa swertres.
Nakasikop usab sila og 176 ka drug personalities nga niresulta sa pagkasakmit sa dul-an duha ka kilo sa gituohang shabu nga mokantidad ang tanan og P11.5 milyunes.
Wala usab naulahi ang paggukod sa wanted persons, diin sila nakadakop og 130 ka mga tawo nga dunay mga pending warrants of arrest nga nag-atubang og lainlaing matang sa kaso. Gitinguha ni Aberin, sigun ni Pelare, nga pinaagi sa sunod-sunod nga anti criminality operations mapugngan ang krimen sa tibuok Central Visayas.
Apan nipaniguro ang heneral nga ang tanang operations sa kapulisan nahasubay sa lagda sa Philippine National Police (PNP). / AYB