Usa ka 54 anyos nga lalaki ang giingong nalumos samtang naligo sa dagat sa Barangay Cotcot, Lungsod sa Liloan, Sugbo, alas 10 sa buntag sa Biyernes, Marso 14, 2025.
Ang biktima giila nga si Danilo Flores, minyo nga taga Purok Hill Top, Sitio San Antonio, Barangay Jubay sa maong lungsod.
Patay na ang biktima sa dihang miabot ang mirespondeng kapolisan.
Ang kapolisan ubos sa kamanduan ni Major Mawi Arcilla, hepe sa Liloan Police Station, nagkanayon nga nagbuy-od ang biktima nga wa nay kinabuhi atol sa ilang pag-abot sa nahitaboan.
Ang asawa sa biktima nga si Cheren, 44, niingon nga adunay gihambin nga balatian ang iyang bana sa kuto-kuto ug kanunay kini niyang gitabang kon mosugmat ang iyang sakit.
Si Cheren nibalibad nga ipaubos ang iyang bana sa autopsy aron masuta kon wa bay foul ang kamatayon niini, sanglit iya nang gidawat ang gidangatan sa biktima. / DVG