Niabot na ngadto sa 54 ang gidaghanon sa nangamatay gumikan sa lapad nga pagdahili sa yuta nga miigo sa gold-mining village sa Masara sa lungsod sa Maco, Davao de Oro diin 63 ka mga tawo ang missing, matod sa mga otoridad niadtong Dominggo, Pebrero 11, 2024.
Ang pagdahili sa yuta miigo sa bukirang baranggay sa Masara niadtong Martes sa gabii, Pebrero 5, human sa mga semana nga pagbunok sa ulan.
Ang Provincial Government sa Davao de Oro niingon sa Facebook post nga 54 ka mga lawas ang na-recover.
Labing menos 32 ka mga residente ang naluwas nga adunay mga samad apan 63 ang nagpabilin nga missing.
Lakip sa nawala mao ang mga gold miner nga nag-atang sa duha ka mga bus padulong manguli sa ilang balay sa dihang nahunlak ang yuta nga nilubong kanila.
Ang operasyon sa pagpangita nababagan sa dili maayo nga panahon ug kahadlok sa daghang pagdahili sa yuta.
Kapin sa 1,100 ka mga pamilya ang gibalhin sa mga evacuation center alang sa ilang kaluwasan, matod sa mga disaster official.
Ang maong dapit gibahaan tungod sa kusog nga ulan sa mga semana sa wala pa ang pagdahili sa yuta.
Ang mga linog nakadaut usab sa mga balay ug mga building sa rehiyon pipila ka mga bulan ang nakalabay, matod sa mga opisyal.