MOABOT sa 5, 285 ka mga Agrarian reform beneficiaries (ARBs) gikan sa lalawigan sa Sugbo ug Bohol ang nakadawat sa ilang mga certificates of Land Ownership Award (CLOAs) ug Electronic Titles human naapuran sa Department of Agrarian Reform (DAR) atol sa pormal nga distribution sa mga opisyal nga titulo sa yuta sa Huwebes, Hulyo 10, 2025.
Giapod sa moabot 485 ka mga ARBs ang 809 ka mga CLOA nga adunay gilapdon nga luna nga moabot sa 840.6278 ektarya.
Samtang giapid usab ang 6, 322 ka mga certificates of condonation with release of mortgages (COCROM) ang gi-distribute sa 5, 285 ka ARBs nga nag cover sa moabot 7, 262.6291 ektaryang luna.
Kini nga paagi ubos sa programa sa DAR pinasubay usab sa Republic Act 11953 nga nagtinguha nga makapapaspas sa proseso ug sistema sa paagi nga maangkon sa mga mag-uuma ang mga gisaupan ug gitikad niining yuta.
Gawas sa titulo ug certificates nga nadawat sa benepisyaryo gi-turnover usab ang farm machineries equipment sama sa 4WD tractors ug trucks sa mga ARB organizations aron mas mapadali usab ang pag-ugmad ug pagpalambo sa yuta ug mga abot niini.
Lakip sa mga benepisyaryo ang usa ka Analyn Erana nga taga Labangon, lungsod sa Tabogon Cebu.
Kinsa ang iyang ginikanan nga si Juana Ylaran nakadawat na sa Certificate of Condonation with release of Mortgage sa moabot 9,368 metro kwadrado nga luna.
Matod ni Erana nga karon nga gihatagan na sila sa titulo, ang ilang tulubagon mao na lang ang pag bayad sa buwisan sa matag buwan sa naasoyng luna.
Si Secretary Conrado Estrella III sa DAR mipahibaw nga moabot sa 175,000 ka mga ARBs na ang nakadawat sa ilang mga titulo ug gitinguha sa kagamhanan nga makaapod pa kini sa moabot 400,000 ka mga benepisyaryo ning tuiga.
“This year pipilitin naming kasi noon hindi kami makaarangkada ng husto kasi may mga dapat kaming ayusin naming mga problema at iyang mga problemang iyang unti-unti na naming naaayos sipag lang talaga at tiyaga kaya naayos na naming ang kailangang titulo na ibigay sa mga magsasaka,” matod ni Estrella sa Hulyo 10, 2025. / ANV