Unom ka mga tawo ang nasuta nga nangawat sa usa ka tindahan sa Dakbayan sa Danao taliwa sa nagpadayon nga imbestigsyon sa Danao City Police Station.
Mokabat sa P4.4 milyunes nga balor sa mga alahas sa usa ka jewelry store ang nawagtang.
Matod ni Police Major Windell Abellana, information officer sa Cebu Police Provincial Office, nga ang mga imbestigador sa kapulisan sa Siyudad sa Danao nanguha pa og mga impormasyon aron makatumbok kinsa ang mga kawatan.
Dili pa makabutyag si Abellana kon local boys ba ang naghimo sa krimen tungod kay wala pa makompleto ang mga kasayuran nga naabot sa provincial command.
Lakip sa gitan-aw sa imbestigasyon kon duna bay inside job sa krimen ilabi na nga nasayod kini kon asa ang pwedeng bangagan sa sementadong bongbong sa tindahan.
Niawhag sila sa publiko nga kon dunay kasayuran sa hitabo labing maayo nga makig-alayon dayon sa kapulisan.
Una na nga nibutyag ang hepe sa Danao City Police Station, Police Lieutenant Colonel Clark Ike Arriola, nga unom ang mga kawatan.
Nakakuha og unom ka paresan sa mga gwantes ug mga sapot ang Scene of the Crime Operation (Soco) sa sulod sa tindahan nga gituohan nga gipanag iya sa mga kawatan.
Giingong didto sa bakanteng luna sa luyo sa tindahan nagpaabot ang mga kawatan nga moabot ang tungang gabii una nila gi buslotan ang bongbong niini.
Dugang ni Abellana nga gipangsubay na ang mga CCTV camera sa dapit aron ilang makita ang nahitabo sa sulod sa maong tindahan.
Kon duna nay mga makuha nga ebedensya ila kining ipakatap sa nagkadaiyang police station alang na unya sa pag padayon sa manhunt operation.
Giangkon ni Abellana nga duna silay nadawat nga impormasyon nga naay dayo nga mga kriminal nga nangabot sa Sugbo apan wala pa sila makasiguro kon kini ba ang nangigo sa Dakbayan sa Danao. / AYB