Nalandig sa tambalanan ang upat ka mga indibiduwal human gidaro ang ilang gisakyan nga motorsiklo sa usa ka Elf truck nga nagkarga og soft drinks nga giingon’g nawad-an og brake mga alas 11 pasado sa Dominggo, Mayo 25, 2025, sa may Barangay Po-og, Dakbayan sa Toledo.
Ang drayber sa maong truck nailhan nga si Ermie Batiansila, 37, ug kauban niya ang truck boy nga si Ariel Wamilda, 45, parehong taga Barangay Putat, Lungsod sa Tuburan.
Ang duha nangaangol human naipit sa atubangan sa truck nga maayong pagkagusbat.
Lakip sa naangol silang Babie Sobroso, lalaki, 34, driver sa motorsiklo, ug ang iyang angkas nga si Joanne Tapangan, 21, Mylene Tapangan, 31, ug 5 anyos nga batang lalaki nga si alyas Shan.
Sa gihimo nga imbestigasyon sa Traffic Enforcement Unit sa Toledo City, nasayran nga ang duha ka mga sakyanan nagsubay sa susamang direksyon apan pag-abot sa nahisgutang dapit, giingong kalit nga nawad-an og brake ang truck hinungdan nga nabanggaan ang motorsiklo nga gisundan niini una pa nilahos sa konkretong koral sa St. Joseph nga simbahan.
Tungod sa grabe nga impact, natanggong sa sulod sa truck ang drayber ug truck boy nga nakaangkon og mga angol.
Samtang ang nagmotorsiklo ug mga angkas niini nangalagpot sa sementedong karsada.
Daling gidala sa Toledo City General Hospital ang mga biktima.
Ang tag-iya sa truck nisaad nga moabaga sa tanang galastuhan sa pagpatambal ingon man ang na damage nga koral sa simbahan. / JDG