Dead on arrival ang 6-anyos nga batang lalaki samtang nagduwa ug naatrasan og pick-up nga gimaneho sa usa ka senior citizen sulod sa usa ka village sa Barangay Tabok, Siyudad sa Mandaue alas 9:00 pasado sa buntag, Hunyo 18, 2025.
Ang biktima nga nakaangkon og grabing kadaot sa iyang ulo nailhan nga si John Inoc, usa ka grade 2 student, residente sa Sector 1, Barangay Pagsabungan sa nahisgutang siyudad.
Samtang ang senior citizen nga drayber sa maong sakyanan giila lang sa alyas nga “Kee” 73-anyos ug nagpuyo ra sa dapit nga nahitabuan sa insidente.
Subay sa gihimong imbestigasyon sa kapulisan sa Mandaue, alas 11:00 pasado na sa buntag nadawat nila ang maong panghitabo ug nadala na ang biktima sa tambalanan.
Sa dugang pakisusi sa kapulisan, nasayran nga ang maong drayber niatras sa iyang sakyanan ug dihang padulong sab siya moabante, nabanggaan ug nalatayan niya ang bata nga giingong gadagan-dagan niadtong higayuna ug tungod sa kakusog sa impact, nagrabihan ang ulo niini.
Matod ni Sophia Inoc, lola sa biktima, nga ang maong bata nisunod sa iyang inahan sa nahisgutang dapit dala ang iyang duwaan nga eroplano nga gigama sa papel kay udto pa man ang klase niini.
Giingong ang duwaan sa bata napasok sa ilawm nga bahin sa sakyanan ug gikuha niya ug didto na siya naatrasan sa drayber sa pick-up.
Nipasalig ang drayber sa sakyanan nga siya ang moabaga sa bayrunon sa hospital ingon man mohatag og cash assistance.
Gikatahong adunay amicable settlement tali sa drayber ug kabanay sa biktima. / JDG