Sa 62 ka mga barangay nga gideklarar sa Regional Oversight Committee on Barangay Drug Clearing (ROCBDC), ang unom niini naa sa dakbayan sa Sugbo.
Ang maong mga barangay mao ang Bacayan, Taptap, Guba, Paril, Pit-os, ug Malubog nga naa nahimutang sa bukirang dapit sa siyudad sa Sugbo.
Matod sa Cebu City Police Office (CCPO), resulta kini sa ilang subsob nga house visitation sa Persons Who Use Drugs (PWUD) aron mapaubos sila sa community-based drug rehabilitation program (CBDRP) sa matag barangay.
Ang CBDRP programa kini sa lokal nga kagamhanan sa dakbayan sa Sugbo pinaagi sa Cebu City Office of Substance Abuse Prevention (Cosap) sa pagpangulo ni Executive Director Jonah John Jumao-as Rodriguez.
Mihimo usab ang unom ka mga barangay og inisyatiba aron mapakgang ang illegal nga drugas sa ilang lugar ug malimpyo ang komunidad sa paggamit sa bisan unsa nga matang sa illegal nga drugas.
Si Police Colonel Ireneo Dalogdog, hepe sa CCPO, gihangop ang maong deklarasyon sa unom ka mga barangay nga drug-cleared.
Iya hinuon nga gipahibawo nga ang pagka-drug- cleared sa usa ka barangay wala kini magpasabot nga wala nay illegal nga drugas nga mosulod.
Magpadayon ang monitoring sa kapulisan sa unom ka mga barangay ilabi na nga accounted na ang drug personalities.
Tumong ug tuyo sa pagpadayon sa ilang kampanya batok sa illegal nga drugas aron masiguro ang kahapsay ug kalinaw sa matag komunidad sa kabarangayan.
Sa datus sa CCPO, nasuta nga duna nay 32 ka mga barangay sa siyudad sa Sugbo ang gideklarar na nga drug- cleared, balido kini sulod lang sa usa ka tuig. / AYB