Pertussis o mas naila nga hutoy nga ubo nakapatay na og unom ka mga masuso sa Metro Cebu.
Si Dr. Eugenia Mercedes Cañal, regional epidemiologist sa Department of Health (DOH) 7, niingon nga tulo sa mga nangamatay sa Cebu City, duha sa Mandaue City ug usa sa Lapu-Lapu City.
Atol sa news forum niadtong Martes, Marso 26, 2024, giawhag ni Cañal ang mga ginikanan nga pabakunahan ang ilang mga anak batok sa sakit, ilabi na niadtong wa pay tuig ngadto na sa lima ka tuig.
Si Cañal nagkanayon nga sagad sa mga nangamatay wa pay usa ka tuig ngadto na sa duha pa ka buwan.
Siya niingon nga aduna silay 115 ka gidudahang mga kaso sukad niadtong Enero diin 42 niini ang nakumpirmar.
Base sa talaan nga gipadala sa DOH 7 sa SunStar Cebu, ang dakbayan sa Sugbo adunay 13 ka kompirmadong kaso; Mandaue City, upat; Lapu-Lapu City, usa; Cebu Province, 19; ug Bohol, lima.
Walay kompirmadong kaso sa Siquijor ug Negros Oriental
Matod pa sa opisyal nga alarming ang maong kaso sa pertussis ug gipanglantawan nga ibalik ang bakuna aron sa pagsumpo sa maong matang sa sakit.
Sa mga gidudahang kaso, o kadtong nagpaabot sa resulta sa confirmatory test, 22 sa Cebu City, duha sa Mandaue City, 14 sa Lapu-Lapu City, 22 sa Cebu Province, siyam sa Bohol ug duha sa Negros Oriental.
HUTOY
Ang hutoy nga ubo tungod sa bakterya nga Bordetella pertussis. Makamatay kini sa mga bata nga wala pay lima ka tuig ang edad ilabi na niadtong wa pa mabakunahi.
Matod ni Cañal nga sagad masaypan kini nga atake sa hubak, ang pertussis mosangpot sa usa ka makatakod nga respiratory infection, nga mikaylap pinaagi sa person-to-person respiratory droplets o pagkontak sa kontaminado nga mga dapit sama sa sinina, kagamitan, ug furnitures.
Ang kasagarang mga simtomas naglakip sa usa ka nagdugay nga ubo nga molungtad og duha o labaw pa nga mga semana, hinay nga hilanat, ug usa ka runny nose o ping-ot.
Matod pa ni Cañal nga ilang ipaubos sa confirmatory test ang mga bata nga nagpakita og sintomas o gidudahang nataptan pinaagi sa swab test.
Matod niya nga ilang isumiter ang mga sample sa Research Institute for Tropical Medicine sa Muntinlupa City, Metro Manila alang sa kumpirmasyon.
Siya niingon nga ang mga bata nga adunay sakit gitambalan sa antibiotics.
Giawhag niya ang mga ginikanan nga dad-on dayon sa tambalanan ang ilang mga anak nga adunay sintomas sa dili pa uwahi ang tanan.