UNOM ka kawatan diin duha niini babaye ang nakadala'g tulo ka carton sa mahalong sigarilyo nga mobalor sa P240,000 human nangawat sa usa ka convenience store, alas 7:45 sa gabii, Martes, Hulyo 22, 2025, sa Barangay Poblacion Uno, Lungsod sa Malabuyoc.
Si Dwight Kuan Kin Tecson, 54, minyo tag-iya sa tindahan nagpuyo sa nahisgutang lugar nangayo’g pakitabang sa kapulisan. Ang mga kawatan gikatahong didto niagi sa luyo sa tindahan.
Si Police Captain Henry Estoy, hepe sa Malabuyoc Police Station nibutyag sa Superbalita Cebu nga grupo ang maong mga kawatan nga gihulagway nga mga Tagalog-Hilongo speaking.
Kini base sa ilang nakuhang impormasyon gikan sa usa ka traysikol driver nga nasakyan sa mga kawatan.
Nasundan sa tag-iya ang mga kawatan nga didto niagi sa luyo apan paspas kaayo kining nawala hinungdan nga dali nga gi-report sa kapulisan.
Nakita sa tag-iya diha sa CCTV camera sa tindahan ang mga kawatan.
Apan wala silay tigbantay sa monitor, labaw na nga wala sab silay guwardiya sa tindahan.
Tungod niini gisubay sa kapulisan ang mga area nga dunay CCTV camera aron masuta unsay laing gisakyan sa mga kawatan.
Giawhag sa kapulisan ang publiko ingon man ang taga Malabuyoc kon makakita sa mga kawatan mo-report da-yon. / GPL