Labing minos unom ka mga langyaw nangaangol sa buwag nga mga aksidente sa sakyanan sa habagatang Sugbo niadtong Biyernes sa hapon ug Sabado sa kaadlawon, Marso 9, 2023.
Nakamugna og kahuot sa dagan sa trapiko sa alas 3 hangtod sa mga alas 4 sa kaadlawon sa Sabado ang pagkabangga sa usa ka tourist van sa usa ka prime mover sa highway sa Brgy. Langtad, Siyudad sa Naga, habagatang Sugbo.
Ang van dunay mga sakay nga 10 ka turistang mga Hapon nga padulong unta sa whale watching sa Tan-awan, Oslob, butyag ni Police Master Sgt. Paul Baclay, traffic police investigator sa San Fernando Police nga gikahinabi sa Superbalita Cebu sa telepuno.
Matod ni Baclay sila sa San Fernando Police ang nakaresponde og una sa alarma sa aksidente apan ilang nasuta nga habig na kini sa Langtad, Naga nahitabo.
Matod ni Baclay nga naatol nga dihay ambulansya sa lungsod sa Badian nga nahiagi gikan naghatod og pasyente sa tambalanan sa Siyudad sa Sugbo pauli sa lungsod.
Ang uban sa Japanese national nadala sa Carcar City District Hospital ug duna say nadala sa South General Hospital sa City of Naga.
Ningresponde sab mao ang mga ambulansya sa San Fernando ug City of Naga.
Ang mga nangaangol giila sa Naga police nga sila si Baby June Fabillar Limbaga, 43, van driver, taga Labangon, dakbayan sa Sugbo ug lima sa iyang mga pasahero nga Japanese nationals nga sila si Maho Arai, Seina Matsuyama, Kei Mamba, Manami Komatsu ug Ran Murakawa.
Sa pasiunang imbistigasyon sa kapulisan sa Siyudad sa Naga ubos sa kamanduan sa ilang hepe nga si Police Lt. Col. William Humoc, samtang nagdagan ang van, usa ka prime mover nga Isuzu Tractor nga gimaniho ni Randy Ypil Lato ,49, minyo, taga Cogon Guinsay, Danao, ni-left turn sa eskina Gairan hinungdan nga nabanggaan.
Si Lato naa na sa kustodiya sa kapulisan sa siyudad.
LIBAONG
Samtang usa ka babaye nga Australian national uban ang usa ka babayeng Sugboanon nangaangol human sila madasmagi og laing sakyanan alas 4 sa hapon sa Biyernes, Marso 8 , 2024 sa Brgy. Malbago, Badian.
Ang mga biktima giila nga mao sila si Savannah Ruby Miller, 19, ug si Angel Chil Ahit Aranquez, 19, nagpuyo sa Poblacion, Badian.
Sa imbestigasyon ni P/Staff Sgt. Jomar Gonzalo, iyang nasayran nga ang mga biktima gikan sa zipline sa Brgy. Sulsogon sa maong lungsod.
Matod pa nga si Miller ang nagmaniho sa motorsiklo samtang si Aranquez nag-angkas padung mopauli sa Poblacion.
Apan kalit lang nibalingis ang motorsiklo ug nikawat sa pikas lane aron paglikay sa usa ka libaong.
Niini, ilang gikasugat ang usa ka Isuzu Forward dropside nga may kargang softdrinks nga gimaniho ni Edilberto Sanchez Andong Jr., 53,minyo, taga Sto. Niño, Malabuyoc, Sugbo nga niresulta sa bangga.
Ang mga biktima gidali sa pagdala sa emergency responders sa Badian ngadto Badian District Hospital apan gibalhin sa sa usa ka hospital sa Siyudad sa Sugbo.
Samtang ang drayber sa trak naa sa kustodiya sa kapulisan sa Badian. / DVG