6 ka mga tawo gipangharos sa service sa barangay

Cebu-City-map
Cebu-City-map

Imbes brake, gasolinador ang natamakan sa drayber sa service sa Brgy. Pahina San Nicolas, dakbayan sa Sugbo.

Mao kini hinungdan nga naharos sa pagbangga ang unom ka mga tawo sa dan duol sa barangay hall pasado alas 11 sa gabii sa Dominggo, Hunyo 2, 2024.

Ang nangaangol nga pulos nangalandig sa tambalanan giila lang sa mga ngalan nga Emelisa, Francis, Britney nga mabdos og upat ka bulan, Merame, 2; Trixie, ug Adelix .

Sumala sa kapulisan, ang patrol car sa Barangay Peacekeeping Security Officer (BPSO) gimaniho ni Felix Ragas, 55, minyo, lumolupyo sa barangay.

Asoy sa drayber ngadto sa kapulisan, pagkaduol na sa ilang barangay hall, mo-brake unta siya apan ang iyang natamakan mao ang gasolinador.

Naharos ang mga biktima nga naa sa daplin sa karsada diin dunay motorsiklo ug e-bike nga nadanyos usab.

Gikaho nga si Brgy. Captain Arnulfo Cambonga pasiunang nigamit sa iyang kuwarta sa pagpatambal sa mga biktima sa ospital.

Nasayran nga nipatawag siya og emergency session sa konseho sa barangay samtang si Ragas gitaktak sa serbisyo.

Atol pagsuwat, wala makuha kon pila ang kantidad sa nagastos sa barangay kapitan.

Dugang nasayran nga nakab-ot na ang amicable settlement tali sa mga biktima nga naharos sa service sa barangay. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph