Ang 180 ka mga residente sa temporaryo nga relocation site nga ‘Ganghaan sa Paknaan’ ibalhin na sa permanenteng balay ug mahimong kabahin sa unom ka socialized housing units sa Mandaue.
Si Mandaue Mayor Jonas Cortes nitug-an sa mga tigbalita niadtong Biyernes, Hulyo 12, 2024.
Hinuon, wala pa gipahibalo ang petsa kon kanus-a ang pagbalhin sa permanente nga balay.
Si Cortes, uban sa mga apektadong komunidad, mihatag og temporaryong relokasyon sa Zone Ahos, Paknaan, agig pagsunod sa Urban Development and Housing Act.
Kini nga kahikayan temporaryo nga naghulat sa pag-uswag sa ilang permanenteng relokasyon.
Kini nga inisyatiba misangpot usab sa pag-ayo sa agianan sa tubig sa Butuanon nga nakabenepisyo sa daghang residente sa Mandaue ug Sugbo.
Ubang giila nga relocation sites sa dakbayan nahimutang sa Barangay Subangdaku, Guizo, Cambaro, Opao, ug Looc.
Ang unang site, Tipolo Residences, usa ka mid-rise socialized housing building sa Sitio Maharlika, Brgy. Tipolo.
Gitataw ni Cortes nga ang mga pamilya sa Ganghaan nagpuyo kaniadto sa danger zone diin nameligro ang ilang kaluwasan matag higayon nga motaas ang tubig sa Butuanon River panahon sa kusog nga uwan.
Kini nga mga pamilya usab grabe nga naapektuhan sa daghang pagbaha kaniadtong 2022 sa dihang ang suba nag-awas.
“Isip mayor sa Mandaue, dili maagwanta sa akong konsensya. Sa ako nang giingon, ang usa ka kaso maatubang sa ulo, pero ang patay dili na mabanhaw”, matod ni Cortes.
Sa usa ka emergency meeting uban sa City Disaster Risk Reduction and Management Council (CDRRMC), gituki ni Cortes ang pagbaha nga nakaapekto sa 14 ka barangay human ang Butuanon River miawas niadtong Septiyembre 9, 2022.
Ang CDRRMC nirekomendar nga ang Sangguniang Panlungsod modeklarar og state of calamity aron maka-access sa calamity funds ug makahatag og hinanaling ayuda sa mga apektadong pamilya.
Ang programa sa relief channel nagtumong sa pag-ilis sa tubig gikan sa main channel sa panahon sa mahinungdanong pagtaas sa lebel sa tubig, pagpaminos sa risgo sa baha sa duol nga mga komunidad.
Kadtong dili ma-accommodate sa Tipolo Residences ibalhin sa temporaryong shelter facilities luyo sa CICC, nga gitawag og “Pasilong sa Mandaue.”/ CAV