Unom ka mga sementeryo sa Mandaue City ang giinspeksyon sa mga awtoridad aron masiguro nga hapsay ug luwas ang pagsaulog sa All Souls’ Day karong Nobiyembre 1.
Ang inspeksyon nga gihimo niadtong Huwebes, Oktubre 17, 2024 naglambigit sa koordinasyon tali sa Mandaue City Police Office, Bureau of Fire Protection (BFP), ug City Disaster Risk Reduction and Management Office (CDRRMO).
Ang mga sementeryo nga gisusi naglakip sa mga nahimutang sa Barangay Jagobiao, Canduman, Pagsabungan, ug Mandaue City Public Cemetery, ingon man duha ka pribadong memorial park nga Manpark ug Rosmar Memorial Park.
Isip pagpangandam sa gipaabot nga pagdagsa sa mga tawo, gipahibawo sa CDRRMO nga 43 ka mga personnel niini ang ipakatap sa mga sementeryo sa dakbayan sugod sa Oktubre 31 hangtod sa Nobiyembre 3.
Ang ilang presensya nagtumong sa paghatag dayon nga tubag sa bisan unsang mga emerhensya ug pagmintinar sa kahusay sa publiko.
MGipahinumdoman sa kagamhanan sa dakbayan ang mga bisita sa pagsunod sa mga regulasyon sa sementeryo, sama sa paglikay sa pagdala sa mga ginadili nga mga butang sama sa mga ilimnong makahubog, hait nga mga butang, ug mga materyales nga masunog. Magpabilin usab nga naka-standby ang mga bombero aron matubag ang posibleng peligro sa sunog.
Gitambagan usab ang mga pamilya nga magplano og sayo sa ilang mga pagbisita aron malikayan ang paghuot ug masiguro ang mas komportable nga kasinatian.
Sa laing bahin, ang deployment sa CDRRMO magtutok sa crowd control, first aid assistance, ug pagmonitor sa entry points aron malikayan ang paghuot sa tawo.
Samtang, ang mga opisyal sa pulisya ibutang sa mga nag-unang lugar aron masiguro ang seguridad ug mapugngan ang kriminal nga kalihokan, lakip ang pagpangawat ug bandalismo.
Gipahinumdoman sa kagamhanan sa dakbayan ang mga bisita sa pagsunod sa mga regulasyon sa sementeryo, sama sa paglikay sa pagdala sa mga ginadili nga mga butang sama sa mga ilimnong makahubog, hait nga mga butang, ug mga materyales nga masunog. / CAV